Dúnıejúzilik bank ókili: Qazaqstandy senimdi seriktes retinde qabyldaımyz

NUR-SULTAN. QazAqparat - QR Premer-Mınıstri Álıhan Smaıylov Dúnıejúzilik banktiń Ortalyq Azııa boıynsha óńirlik dırektory Tatıana Proskýrıakovamen kezdesý ótkizdi, dep habarlaıdy QazAqparat Úkimettiń resmı saıtyna silteme jasap.

Taraptar Dúnıejúzilik bank tarapynan Qazaqstandaǵy damý reformalaryn qoldaý sharalaryn talqylady. Osy jumys aıasynda naqty qadamdardyń tizimin qamtıtyn birlesken joba ázirlendi.

Jobany iske asyrý telekommýnıkatsııa sektorynda naryqtyq básekelestikti kúsheıtýdi, tsıfrlyq tehnologııalar sektorynyń tutastyǵyn arttyrýdy jáne tsıfrlyq ekonomıkany damytýdy qoldaýdy kózdeıdi.

Budan basqa, memlekettik satyp alýlardaǵy básekelestikti jáne ashyqtyqty jetildirý, bank sektorynyń jumysyn jaqsartý, sybaılas jemqorlyqqa qarsy kúres jónindegi sharalardy kúsheıtý, aglomeratsııalardy damytý, sondaı-aq ekologııalyq jáne tıimdi energııany óndirý boıynsha sharalar qarastyrylǵan.

«Qazirgi jaǵdaıda bul joba Qazaqstan úshin óte mańyzdy. Ol daǵdarysqa qarsy qabyldanyp jatqan sharalarǵa jáne elimizdiń jańa ekonomıkalyq baǵytyn iske asyrýǵa qoldaý kórsetýdi qamtamasyz etedi», — dedi Álıhan Smaıylov.

Óz kezeginde Tatıana Proskýrıakova Dúnıejúzilik bank Qazaqstandy senimdi seriktes retinde qabyldaıtynyn, sondyqtan ózara tıimdi yntymaqtastyqty jalǵastyrýǵa daıyn ekenin atap ótti.

«Biz Qazaqstan Úkimetiniń alǵa qoıǵan maqsattarǵa qol jetkizýine múddelimiz. Meniń oıymsha, kóptegen baǵyttar boıynsha úlken perspektıvalar bar», — dedi Tatıana Proskýrıakova.

Kezdesýdi qorytyndylaı kele, Úkimet basshysy Ulttyq ekonomıka mınıstrligine múddeli memlekettik organdarmen birlesip, reformalar matrıtsasyn kelisýdi jandandyrýdy tapsyrdy.

Foto: primeminister.kz