Dúnıejúzilik bank ókili: Et eksportynda kólem emes, fermerlerdiń tabysy mańyzdy
«Qazaqstanda et eksporty boıynsha áleýet joǵary. Memleket úshin etti eksporttaýmen qatar, bir mezgilde ony ımporttaý qalypty jaǵdaı. Bundaı jaǵdaı kóptegen elderde baıqalyp otyr. Óıtkeni ettiń túrine qaraı suranys bolady. Jalpy, et eskportyn arttyrý úshin tıisti alǵysharttardy kórip turmyz. Bul turǵyda jaqyn jerde ornalasqan naryqtardyń múmkindigi joǵary. Qytaı naryǵyna shyǵý óte qıyn, ol úshin birqatar sanıtarlyq, veterınarlyq kelisimderdi bekitý kerek. Osy oraıda Úkimet sońǵy eki jylda bul baǵytta aýqymdy jumystardy atqardy. Endi jumystyń qıyn baǵyttary qaldy, ıaǵnı jem-shóp bazasyn, ónim sapasyn jaqsartý, sondaı-aq óndiris pen qaıta óńdeý kólemin arttyrý sharalaryn eńserý kerek», - dedi sarapshy Parlament Májilisinde et jáne sút ónimderin óndirýdi, eksporttaýdy damytý taqyrybyndaǵy parlamenttik tyńdaýda.
Bul turǵyda ol atalǵan baǵytta kóptegen durys qadamdar jasalǵanyn, endi tabysqa jetý úshin ýaqyt kerektigin atap ótti
«Mal sharýashylyǵy - uzaq merzimge negizdelgen sala. Sondyqtan nátıjege qol jetkizý úshin birneshe jyl kerek. Atap aıtqanda, áleýet óte joǵary jáne osy saladaǵy qadamdar durys jasalyp keledi. Sáıkesinshe, aldaǵy ýaqytta jaqsy nátıjelerdi kóre alamyz», - dedi S. Zorıa.
Onyń atap ótýinshe, Elbasy Nursultan Nazarbaevtyń qaıta óńdelgen aýyl sharýashylyǵy ónimi eksportyn 2022 jylǵa qaraı 2,5 ese kóbeıtý tapsyrmasyn oryndaý múmkindigi zor.
«Bul rette ónim kólemimen qatar, eksporttyń turaqtylyǵy men quny, onyń qurylymy jáne fermerlerdiń tabysy mańyzdy. Kóp jaǵdaıda eksporttyń az mólsherimen de qomaqty tabysqa kenelýge bolady», - dedi DB ókili.