Dúnıejúzilik bank Qazaqstannyń energııa júıesine aýdıt júrgizýge grant bóldi

NUR-SULTAN. QazAqparat – QR Energetıka mınıstrligi Dúnıejúzilik banktiń grant kómegi aıasynda energııa óndirýshi jáne energııa berýshi uıymdarǵa tehnıkalyq aýdıt júrgizý boıynsha jumysty bastady. Bul týraly vedomstvo basshysy Bolat Aqsholaqov Májilis depýtattarynyń saýalyna joldaǵan jaýabynda málim etti, dep habarlaıdy QazAqparat tilshisi.

«Mınıstrlik energııa kózderine tehnıkalyq aýdıt júrgizý jónindegi is-sharalar josparyn ázirledi. Josparda jalpy pasporttaý jáne elektr energııasyn generatsııalaý obektileriniń tsıfrlyq kartasyn qalyptastyrý jolymen energııa kózderiniń kameraldyq tehnıkalyq aýdıtin, esep jasaı otyryp, energııa kózderiniń tehnıkalyq aýdıtin júrgizý kózdeledi. Jelilerdi jańǵyrtý boıynsha jumys jyl saıyn jáne josparly túrde atqarylady, biraq energııa berýshi uıymdar qarajatynyń shekteýli bolýyna baılanysty elektr jelilerin qysqa merzimde jańǵyrtý múmkin emes», - dep jazady mınıstr.

Onyń málimetine súıensek, búgingi tańda eldegi energııa berýshi uıymdardyń 70%-dan astamy jeke menshikte.

«Mınıstrlik Dúnıejúzilik banktiń grant kómegi aıasynda energııa óndirýshi jáne energııa berýshi uıymdarǵa tehnıkalyq aýdıt júrgizý boıynsha jumysty bastady. Bul jumys eki kezeńde iske asady. Birinshi kezeńde elektr stantsııalarynyń aýdıtin júrgizý jáne ekinshi kezeńde elektr jelileri uıymdarynda júzege asyrý boljanyp otyr. Dúnıejúzilik bankpen osy jumysty júrgizýge tehnıkalyq tapsyrma kelisildi. Qazirgi ýaqytta bank osy qyzmette halyqaralyq tájirıbesi bar sarapshylardy izdestire bastady. Sondaı-aq, bul jumysqa elektr energetıkasy salasynda óndiristik tájirıbesi mol jergilikti táýelsiz sarapshylar tartylady. Osy jumystyń qorytyndylary energııa kásiporyndarynyń negizgi jabdyǵynyń naqty tehnıkalyq jaı-kúıin aıqyndaıdy», - dep jazylǵan mınıstrdiń jaýabynda.

QR Indýstrııa jáne ınfraqurylymdyq damý mınıstrliginiń málimeti boıynsha, keıingi bes jylda elektr energııasyn tutyný kólemi 27 paıyz artqan.