Dúnıejúzilik bank Qazaqstandaǵy reformalarǵa baǵa berdi

ASTANA. QazAqpara - Dúnıejúzilik banktiń Eýropa jáne Ortalyq Azııa óńirleri boıynsha vıtse-prezıdenti Sırıl Mıýller Qazaqstandaǵy qarjylyq ınstıtýttyń jumysyn qorytyndylady, dep habarlaıdy QazAqparat. 

Ol Astana ekonomıkalyq forýmy aıasyndaǵy «Dúnıejúzilik bank. Qazaqstan - eldi júıeli dıagnostıkalaý» atty sessııasy barysynda bıyl DB men Qazaqstan yntymaqtastyqtyń 25 jyldyǵyn atap ótip jatqanyn jetkizdi.

«Osy óńirde kóp ýaqyttan beri jumys istegen sarapshy retinde Qazaqstannyń aıtarlyqtaı alǵa jyljyǵanyn rastaı alamyn. Osy oraıda Úkimet pen seriktesterge 25 jyl boıy bildirgen senimderi úshin bizdiń alǵysymyzdy jetkizgim keledi. Táýelsizdiginiń alǵashqy kúnderinen bastap Qazaqstan gúldengen ultty qurýda batyl qadamdrǵa bardy. Bul turǵyda elderińiz ońtaıly transformatsııany júzege asyrýǵa qaýqarly boldy»,-dedi S. Mıýller.

Sonymen qatar ol Qazaqstanda sońǵy 10 jylda kedeıshilik eki esege qysqarǵanyn, bul rette el azamattarynyń tabysy artqanyn sóz etti.
«Kúnine 5 dollardan kem qarjyǵa ómir súretin halyqtyń úlesi 50 paıyzdan astam deńgeıden búginde 20 paıyzdan tómen kórsetkishke deıin qysqardy. 2006 jyly memleket ortadan joǵary deńgeıdegi tabysy bar eldiń mártebesine kóshti»,-dep naqtylady ol.

DB vıtse-prezıdentiniń sózinshe, osyndaı nátıjelerge qol jetekizý úshin Qazaqstan munaı resýrstaryn paıdalanyp, mańyzdy ınfraqurylymǵa erekshe mán berip, ınvestıtsııalardy adamı kapıtaldy qurýǵa, bilim men densaýlyq saqtaý sektorlaryn qoldaýǵa, naryqtyq ekonomıkaǵa negizdelgen qolaıly jaǵdaıdy júzege asyrýǵa baǵyttaǵanyn atap ótti.