Dúnıejúzilik bank ındýstrııalandyrýdy tıimdi uıymdastyrý boıynsha ádistemelik kómek kórsetedi

ASTANA. QazAqparat - Dúnıejúzilik banktiń sarapshylary Qazaqstannyń ındýstrııaldy saıasatynyń tıimdi jumysy men uıymdastyrý sharalary boıynsha ádistemelik kómek kórsetedi. Bul týraly búgin Qazaqstandaǵy ındýstrııalandyrý jónindegi konferentsııada QR Investıtsııalar jáne damý mınıstri Áset Isekeshev málim etti.

«Bizdiń basty maqsat - jańǵyrtýdy jalǵastyryp, jańa ónerkásip pen jańa ekonomıkany qurý. Dúnıejúzilik bankpen birlese arnaıy topty qurdyq. Osy oraıda DB sarapshylary ındýstrııaldy saıasatty tıimdi júrgizý úshin atqaratyn jumystardy zerdelep shyqty»,-dedi mınıstr.

Á. Isekeshev bul turǵyda Dúnıejúzilik banktiń tájirıbesi mol ekenin atap ótti.

«Olar osy jumystardy tyńǵylyqty baıqap otyr. Kóptegen elderde júrgizilip jatqan ekonomıkalyq reformalar birinshi kezekte Dúnıejúzilik banktiń ádistemelik kómegi arqyly júzege asyrylýda. Búgin jáne erteń biz mınıstrlikte Dúnıejúzilik banktiń delegatsııasymen osy máselelerdi talqylaıtyn bolamyz. Alaıda búgin sarapshylyq deńgeıde elenbeı qalǵan máselelerdi talqylaýdy jón kórip otyrmyz»,-dedi vedomstvo basshysy.

Óz kezeginde Qazaqstandaǵy Eýropalyq Odaqtyń turaqty ókili Aýrelııa Býshe EO tarapy Qazaqstannyń óziniń ekonomıkasyn ártaraptandyrýdy qandaı qarqynmen sheship jatqandyǵyn qyzyǵýshylyqpen baıqap otyrǵanyn atap ótti.

«Ekonomıkany ártaraptandyrýdaǵy qaýqarsyzdyq áleýmettik jáne saıası tártipsizdikterdi arandatyp, keıin osyǵan alyp kelýi múmkin. Halyqty jumyspen qamtýda úlken múmkindikterdi jáne óndiristerde qosymsha jumys oryndaryn qura otyryp, biz bundaı problemalardan qutyla alamyz. Sondyqtan da damý úrdisiniń jalǵasýy óte mańyzdy, al osy turǵyda ártaraptandyrý sharalary aıryqsha nazarda bolýy tıis»,-dedi A. Býshe.