Dúnıejúzi qazaqtary qaýymdastyǵy kezekten tys Prezıdenttik saılaý ótkizýdi qoldaıdy

ASTANA. QazAqparat - Búginde quramynda 5 mıllıonnan astam múshesi bar Dúnıejúzi qazaqtarynyń quryltaıy 14 aqpanda Qazaqstan halqy Assambleıasynyń 2015 jyly kezekten tys Prezıdenttik saılaý ótkizý týraly usynysyn tolyǵymen qoldaıdy. Mundaı málimdemeni búgin Dúnıejúzi qazaqtarynyń quryltaıy tóralqa tóraǵasynyń birinshi orynbasary Talǵat Mamashev jasady.

«...Álemdegi ekonomıkalyq daǵdarys tolyǵymen eńserilmeı jatyp, onyń kelesi tolqyny boı kóterip otyr. Qazaqstan jahandyq ekonomıkanyń quramdas bir bóligi bolǵandyqtan, qarjylyq-ekonomıkalyq tyǵyryqtyń qyspaǵyn sezinbeı qalýy múmkin emes. Sonyń aldyn alý maqsatynda Elbasy «Nurly jol - bolashaqqa bastar jol» strategııalyq Joldaýyn halyqqa jarııa etti. Búginde osy qujat aıasynda naqty qadamdar jasalýda», - dep málimdedi T. Mamashev.

Onyń aıtýynsha, geosaıası shıelenis, sonyń saldarynan quldyraǵan ekonomıka jalpy damýǵa kedergi keltirýde.

«Bul jaıttar qoǵamdy alańdatatyny ras. Osyndaı jaǵdaıda eldi kúttirmeı, Prezıdenttik saılaýdy kezekten tys ótkizgen durys dep oılaımyz», - dep atap ótti T. Mamashev.

Onyń aıtýynsha, shet eldegi qazaq dıasporasy tarıhı Otandaryndaǵy osyndaı uly iske súısine tileýlestikterin bildirýde.

«Máseleni áriden túsingen tutas halyq, eldiń ıgi jaqsylary, Dúnıejúzi qazaqtary - Qazaqstan halqy Assambleıasy Keńesiniń kezekten tys saılaý ótkizý bastamasyn qoldap, ún qatady. Bul - «Máńgilik el» ıdeıasy jolyndaǵy basty qadamdardyń biri dep sanaımyz», - dep túıdi T. Mamashev.