Dúnıejúzi qazaqtary Halıfa Altaıdyń eńbekterine arnalǵan konferentsııada bas qosty
Atalmysh shara Dúnıejúzi qazaqtarynyń V quryltaıy aıasynda túrki álemine keńinen tanymal dintanýshy-ǵalym Altaı Halıfa Ǵaqypulynyń týǵanyna 100 jyl tolýyna oraı uıymdastyryldy. Maqsaty - «Quran Kárimdi» qazaq tiline aýdarǵan jáne onyń basyp shyǵarylýynyń basy-qasynda bolǵan, dintanýshy-ǵalym, jazýshy, aqyn, etnograf Halıfa Altaıdyń sanqyrly ǵylymı, shyǵarmashylyq, qoǵamdyq qyzmetin jan-jaqty ashyp kórsetý.
Alqaly jıynda caıasattanýshy, halyqaralyq jýrnalıst Dosan Baımolda, Túrkııanyń Mımar Sınan ýnıversıtetiniń professory, tarıhshy Ábdýaqap Qara, fılologııa ǵylymdarynyń doktory, shyǵystanýshy ǵalym Islam Jemeneı sekildi belgili ǵalymdar men tarıhshylar Altaı Halıfa Ǵaqypuly týraly tereń mándi, tanymdyq baıandamalar oqydy. Sharaǵa álemniń ár túkpirinen Dúnıejúzi qazaqtarynyń V quryltaıyna kelgen qonaqtar, Altaı Halıfanyń balalary men nemereleri qatysty.
Konferentsııa sońynda «Qazaqstan ǵalymdarynyń bıblıografııasy» serııasynda qazaq, orys, túrik, aǵylshyn tilderinde jáne tóte jazý álipbıimen «Altaı Halıfa Ǵaqypuly» atty kitabiniń tusaýy kesildi.
H.Altaı aýdarǵan Quran arab grafıkasymen 1989 jyly jaryq kórdi. Ol osy nusqany 1991 jyly Dálelhan Janaltaımen birlesip, «Quran kárim, qazaqsha maǵyna jáne túsinigi» degen atpen mol tırajben Saýd Arabııasynyń baspasóz ýázirligi tarapynan kırıll áripterimen shyǵartyp, qazaq eline jetkizdi. Halıfa Altaı aýdaryp shyǵarǵan «Qurannyń» bul nusqasy Qazaqstannan syrt: Reseı, Mońǵolııa, Qyrǵyzstan, Ózbekstanda, Ázerbaıjan elderinde turatyn qazaqtardyń úlken rýhanı baılyǵyna aınaldy. Kitap Medıne qalasyndaǵy patsha Fahdtyń «Quran Kárimdi» basýǵa arnalǵan kombınatynda basyp shyǵarylady.