Dúnıejúzi qazaq jastary arasynda shaǵyn fýtboldan jarys ótti
Týrnır Almaty qalasynda «Er Jánibek» halyqaralyq qoǵamdyq qorynyń uıymdastyrýymen ótti.
Bıylǵy týrnır belgili ǵalym, fılologııa ǵylymdarynyń doktory, professor Tursynbek Kákishevtiń 90 jyldyq mereıtoıyna arnaldy.
Oıynnyń birinshi kúngi qorytyndysy boıynsha, ekinshi kezeńge «Qazaq Ystanbul» (Túrkııa), «Ámir» (Reseı, Saratov qalasy), «Baıólke» (Mońǵolııa), «Dastan» (Iran), «NFC Kazakhstan Pavlodar» (Qazaqstan, Pavlodar), «Birlik-Kerýen» (Almaty), «Ǵafýr» (Almaty), «Alataý» (Almaty) fýtbol komandalary (FK) joldama aldy.
Ekinshi kúngi oıynda jartylaı fınalda «NFC Kazakhstan Pavlodar» men «Ámir» oınap, 4:1 esebimen «NFC Kazakhstan Pavlodar» fınalǵa shyqty. Al «Birlik-Kerýen» men «Baıólke» arasynda bolǵan oıynda 6:1 esebimen «Birlik-Kerýen» fınalǵa ótti.
Úshinshi orynǵa talasta «Ámir» FK «Baıólke» FK-ny jeńip, 300 myń teńgeni qanjyǵasyna baılady. Al «Baıólke» fýtbolshylaryna 200 myń teńge syıaqy berildi.
Al fınalǵa shyqqan «Birlik Kerýen» men «NFC Kazakhstan Pavlodar» arasyndaǵy oıyn 3:2 esebimen aıaqtalyp, «ER JANIBEK CUP-2017» halyqaralyq týrnıriniń kýbogyna jáne 1 mln teńge qarjylaı syıaqyǵa «Birlik Kerýen» FK ıe boldy. «NFC Kazakhstan Pavlodar» komandasyna 500 myń teńge syıaqy berildi.
«Biz bul týrnırge kóp daıyndaldyq. Byltyr qatysyp esemizdi jiberip alǵan edik. Al bıyl uttyq. Bári jigitterdiń kúsh-jigeri. Al týrnır joǵary deńgeıde ótti. Buryn tek shetelden kelgen qazaqtar arasynda ótetin. Bıyl jergilikti komandalar qosylyp otyr. Osy sebepti de týrnır qyzyqty ótti», - dedi jeńiske jetken «Birlik Kerýen» FK-nyń negizin qurýshy Manat Maǵaz.
Budan bólek, «Er Jánibek» halyqaralyq qoǵamdyq qorynyń taǵaıyndaýymen úzdik oıyn kórsetken «NFC Kazakhstan Pavlodar» FK-nyń oıynshysy Asqar Ajıkov - «Surmergen», «Qazaq Ystanbul» FK-nyń oıynshysy Janer Ahmet Bozqurt - «Úzdik shabýylshy», «Ámir» FK-nyń qaqpashysy Rýslan Mashtakov - «Úzdik qaqpashy» jáne «Namys» FK-nyń (Reseı, Omby) oıynshysy Nýrahmet Nıgmanov «Úzdik qorǵaýshy» nomınatsııalary boıynsha jeńimpaz atandy.
Sondaı-aq, Tursynbek Kákishev atyndaǵy arnaıy «Eldik rýh» syılyǵy Frantsııadan kelgen «Parij Kazakh sport» FK-ǵa jáne Qyrǵyzstannan kelgen «Alash» FK-ǵa berildi.
Alystan at arytyp kelgen qazaq komandalary týrnırdiń jabylý saltanatynda qoǵamdyq qorǵa jáne uıymdastyrýshylarǵa alǵysyn aıtty.
«Bar ómirin qazaq ádebıetine arnaǵan Tursynbek Kákishevtiń 90 jyldyǵyna arnalǵan «Er Jánibek» halyqaralyq qorynyń fýtbol týrnıri qutty bolsyn. Bizdi «sheteldegi qandastarymyz» dep baýyryna basyp jatyr. Sondyqtan Frantsııa qazaqtary atynan osy sharany uıymdastyrýǵa at salysqan barlyq azamattarǵa alǵys aıtamyz», - dedi Parıjdegi qazaq mádenı ortalyǵynyń jáne «Parij Kazakh sport» FK jetekshisi Tábárik Doolý.
Jeńimaz komandaǵa kýbok tapsyrǵan «Er Jánibek» halyqaralyq qoǵamdyq qorynyń prezıdenti Jeńis Túrkııa sóz sońynda barlyq qatysýshy komandalarǵa alǵys bildirdi.
Aıta keteıik, «ER JANIBEK CUP-2017» halyqaralyq týrnıri 21 qazan kúni bastalǵan. Jarysqa shetelden kelgen «Qazaq Ystanbul» (Túrkııa), Ámir» (Reseı, Saratov qalasy), «Úshtas» (Qytaı, Beıjiń) «Parij Kazakh sport» (Frantsııa, Parıj), «Namys» (Reseı, Omby qalasy), «Baıólke» (Mońǵolııa), «Alash» (Qyrǵyzstan), «Dastan» (Iran) komandalary jáne Qazaqstannan «NFC Kazakhstan Pavlodar» (Qazaqstan, Pavlodar), «Taımas» (Qazaqstan, Soltústik Qazaqstan oblysy), «Namys» (Qazaqstan, Túrkistan qalasy), «Jeruıyq» (Qazaqstan, Taldyqorǵan qalasy) komandalary, sondaı-aq, Almaty qalasynan «Birlik-Kerýen», «Saýyr», «Erentaý», «Úshqońyr», «Besqala», «Barys», «Alataý», «Ǵafýr» komandalary qatysty.