Dýnaı Espaev: Elbasynyń sózi bolashaqqa degen úmitimizdi nyǵaıta tústi

QARAǴANDY. QazAqparat - Qaraǵandy qalasynyń K.S. Stanıslavskıı atyndaǵy orys drama teatrynyń dırektory Dýnaı Espaev ulyqtaý rásiminen keıin QR Prezıdenti Qasym-Jomart Toqaevtyń sóılegen sózderi jaıly óz pikirin bildirdi, dep habarlaıdy QazAqparat tilshisi.

«Qasym-Jomart Toqaevtyń prezıdenttik saılaýdaǵy jeńisimen elimizde ekonomıkalyq, saıası damýdyń jańa deńgeıi bastaldy», - dedi Dýnaı Espaev.

Teatr dırektory Prezıdent mádenıet salasynyń damýyna erekshe nazar aýdarylatynyn atap ótkeni barlyq mádenıet qyzmetkerlerin qýantqanyn aıtady.

«El Prezıdenti ulyqtaý rásiminde sóılegen sózinde 10 mindetti atap ótti. Alǵa qoıylyp otyrǵan bul maqsattar Qazaqstannyń Dúnıejúzilik damýdyń jıeginde qalyp qoımaı, progreske umtylýyna yqpal etetin bolady. Bizderge, áleýmettik-rýhanı salanyń qyzmetkerlerine mádenıet salasyndaǵy oń ózgerister jalǵasatyny, bul baǵytta jasalyp jatqan jumystar qurǵaq sandarmen emes, naqty nátıjelermen ólshenetini erekshe qýanysh syılady. Halyqtyń daýsy nazarǵa alynatyn azamattyq qoǵamdy damytý, ulttyq senim keńesin, Prezıdenttik kadrlyq rezervti qurý, Áleýmettik sala qyzmetkerleriniń mártebesin kóterý - osynyń barlyǵy bolashaqqa úmit uıalatady», - dep atap ótti teatr basshysy.