«Dýmandy kerýen» astanany aralap júr
Ol elorda ákimdiginiń qoldaýymen uıymdastyrylǵan. Іs-shara koronavırýs pandemııasyna baılanysty sanıtarlyq-epıdemıologııalyq talaptardy qatań saqtap ótkizilýde.
«Kontsertte óner kórsetetin ánshilerdiń barlyǵy vaktsına alǵan, uıymdastyrýshylar 3 kún saıyn PTR-test tapsyrady. Bul álemdik indettiń taralý qaýpin báseńdetedi. Saqtyq sharalary qoǵamymyz úshin, qalamyz úshin asa mańyzdy ári qajet», - deıdi uıymdastyrýshylar.
Іs-sharany ótkizýdegi maqsat – elorda turǵyndaryna merekelik kóńil-kúı syılaý jáne el táýelsizdiginiń 30 jyldyǵynda turǵyndardyń patrıottyq rýhyn kúsheıtý.
Sondaı-aq qala halqynyń qatań pandemııa jaǵdaıynda bir orynǵa jınalmaýyn qamtamasyz etý maqsatynda kontsert formatynda jyljymaly sahna tańdalyp alynǵan.
Ártister, óner ujymdary bólek avtobýsta bolady.
«Dýmandy kerýen» jyljymaly kontserti kezinde ónerpazdar Nur-Sultan qalasynyń 4 aýdany: Esil, Saryarqa, Almaty jáne Baıqońyr aýdandaryna kiretin turǵyn alaptaryn aralaıdy.
4 saǵattyq arnaıy kontserttik baǵdarlama jasalǵan. Baǵdarlamada qazaq halqynyń mýzykalyq murasy nasıhattalyp, ulttyq saz aspaptarymen án-kúı oryndalady.
Sonymen birge estrada janrynda ánder shyrqalady. Oǵan «Qorqyt» etno ansambli, «Saryarqa» folklorlyq ansambli, Úrlemeli aspaptar orkestriniń artısteri, Araılym Raqym, Nurjan Meıirhan, Saltanat Serkebaeva, Aınur Qonysbaeva, Asqar Áshim, Ákimhan Majenov, Muratbek Haırolda, Dıana Maeva, Dos jáne basqa ánshiler qatysady.
«Dýmandy kerýen» jyljymaly kontserti 1 shildede Esil aýdanyna qarasty «Úrker» jáne «Prıgorodnyı» turǵyn alaptaryn aralady.
2-3 shildede Saryarqa aýdanyna qaraıtyn «Kóktal-1», «Kóktal-2», «Agroqalashyq», 4-5 shildede Almaty aýdany terrıtorııasyndaǵy «Kúıgenjar», «Mıchýrıno», «Internatsıonalnyı», «Temirjol», «Óndiristik», «Ońtústik-Shyǵys», 6 shildede Baıqońyr aýdanyndaǵy «Qazgorodok», «Kırpıchnyı», «Chýgýnka» turǵyn alaptary men elorda irgesindegi eldimekenderdi aralaıdy.
Kontserttik baǵdarlama turǵyndar qyzyǵýshylyǵyn týǵyzdy. Kerýenge qol bulǵap, sálem joldap, tipti aýlasynda jaıqalyp ósip turǵan raýshan gúlin úzip ákep, ánshilerge syıǵa tartqan sátter de boldy.
«Prıgorodnyı» turǵyn alabynda turatyn QR Ulttyq qaýipsizdik komıtetiniń 100 jastaǵy zeınetker generaly úıiniń aldynan ótken dýmandy kerýen ártisterine aq batasyn berip, rızashylyǵyn bildirdi.
Karantın talaptary qatań bolǵandyqtan, jyljymaly kontsert esh jerge aıaldaı almady. Dese de, turǵyndar yqylasy erekshe ekeni baıqalady.