Dúkenderde kúnbaǵys maıy arzandady – Saýda mınıstri

ASTANA. QazAqparat – QR Saýda jáne ıntegratsııalar mınıstri Serik Jumanǵarın maýsymaralyq kezeńde halyqty azyq-túlikpen qamtý jumystary týraly aıtyp berdi, dep habarlaıdy QazAqparat tilshisi.

«Naryqtaǵy baǵany turaqtandyrý tetikteri sheńberinde jasalǵan qordan naryqty tolyqtyrý jumystary jalǵasýda. Bıyl tarıftik/tarıftik emes retteýdiń ýaqtyly sharalary oń nátıje berdi», - dedi S. Jumanǵarın Úkimettiń búgingi otyrysynda.

Máselen, kúnbaǵys tuqymyna kedendik baj salyǵyn engizý arqyly óndirýshilerde kúnbaǵys maıynyń baǵasyn turaqtandyrýǵa múmkindik týdy. Qazirgi ýaqytta óńdeý kásiporyndarynda jáne saýda oryndarynda kúnbaǵys maıy baǵasynyń tómendeý dınamıkasy baıqalady.

«Pııazdyń agressıvti eksportyn boldyrmaý úshin 3 aıǵa eksportqa tyıym salynǵan, keıinen bul tyıym kvotaǵa aýystyryldy. Bul shara halyqty pııazben qamtamasyz etýge múmkindik berdi jáne aldyńǵy jyldardaǵy qyryqqabat pen kartop sııaqty baǵanyń kúrt ósýine jol bermedi», - dedi mınıstr.

Qazirgi ýaqytta 2024 jyldyń maýsymaralyq kezeńin qamtamasyz etý úshin 2023 jylǵy kúzgi eginge kelisimsharttar jasalýda. Búgingi tańda 90 myń tonnaǵa jýyq ónim jınalǵan.

«Jergilikti atqarýshy organdar kelesi jyldyń maýsymaralyq kezeńindegi kelisimsharttardy jasaýdy jyldamdatýy kerek», - dep eskertti Saýda mınıstri.

Buǵan deıin Serik Jumanǵarın elimizdiń qandaı azyq-túlik ımportyna táýeldi bolyp otyrǵanyn aıtty.