Dýbaıda shańdy daýyl soǵyp, 10 ushaq jergilikti áýejaıǵa qona almady

DÝBAI. QazAqparat – Dýbaı halyqaralyq áýejaıynda keshe aýa raıynyń qolaısyzdyǵyna baılanysty reıster toqtatyldy. Áýejaı basshylyǵy qonýy tıis 10 ushaq ózge áýejaılarǵa baǵyttalǵanyn málim etti, dep habarlaıdy QazAqparat tilshisi Khaleej Times basylymyna silteme jasap.

Birikken Arab Ámirlikteriniń aýmaǵyn shańdy daýyl basty. Ulttyq meteorologııa ortalyǵynyń málimetinshe, Abý-Dabı jáne Dýbaı halyqaralyq áýejaılarynyń aýdandarynda joldyń kóriný deńgeıi 500 metrden az boldy. Áýe aılaǵynyń basshylyǵy 10 reısti Dubai World Central jáne basqa da kórshiles áýejaılarǵa jiberýge sheshim qabyldaǵan.

Jergilikti Flydubai áýe tasymaldaýshysy qonatyn jáne ushatyn reısterdiń keshigýine aýa raıy jaǵdaılary sebep bolǵanyn málimdedi.

Meteorologııa ortalyǵynyń resmı aýa raıy bıýlletenine sáıkes, shańdy daýyl men jańbyr aldaǵy tórt kún boıy jalǵasady.

Abý-Dabı polıtsııasy júrgizýshilerdi qatty jel men shańda joldyń nashar kórinýine baılanysty abaı bolýǵa jáne shańdy daýyldy foto-vıdeoǵa túsirmeýge shaqyrdy.

«Ózińizdiń jáne ózgelerdiń qaýipsizdigi úshin beınekameraǵa túsirýge nemese telefonǵa alańdamańyz», - dep habarlady polıtsııa.

Keshkisi Ál-Aın, Ras-ál-Haıma jáne Fýdjeıra ámirlikterinde qatty jańbyr jaýdy. Bılik turǵyndarǵa sý tasqyny men kóshkinge beıim aýdandardan aýlaq bolý qajettigin eskertti.

Bıyl Irak, Kýveıt, BAÁ, Saýd Arabııasy, Iran jáne basqa da elderdegi qumdy daýyldar klımattyń ózgerýine baılanysty kúsheıe tústi, dep habarlaıdy AlArabiya agenttigi.

Foto: khaleejtimes.com