Dýbaı soty áıel polıtseımen durys túsinise almaǵany úshin aıyptalǵan qazaqstandyqqa qatysty úkim shyǵardy

ÁBÝ-DABI. QazAqparat - 2014 jylǵy jeltoqsanda dýbaılyq «Dubai Mall» metropolıteni stansasynda Qazaqstan azamaty K.B.-nyń qatysýymen jaısyz oqıǵa oryn alǵan. 49 jastaǵy Aqmola oblysynyń týmasy saýda ortalyǵynyń qaı jerde ornalasqanyn BAÁ-niń áıel polıtseıinen surap bilmek bolady.

Alaıda otandasymyz tártip saqshysyn ózine qaratý úshin durys tásil qoldanbaı, ony eki ret ıyǵynan tartqan. Bul ýaqytta basqa azamatpen áńgimelesip turǵan áıel polıtseı burylyp qarap, oǵan daýys kótere bastaıdy.

- Ol menen Dubai Mall qaı baǵytta ekenin surady, men oǵan joldy kórsettim, ol men túsinbeıtin tilde jaýap berdi, - degen aıǵaq berdi jábirlenýshi. Áıel polıtseı ony ózimen birge ýchaskege aparmaq bolǵan. Ol bolsa bas tartqan. Áıelge kómekke kelgen taǵy eki polıtseı týrısti ýchaskege alyp júrmek bolǵanda, ol qarsylyq kórsetken. Metrodaǵy beınebaqylaý kamerasy onyń áıel polıtseıdiń ıyǵyna qolyn tıgizgen tusyn túsirip alǵan. Dýbaı soty osy vıdeony onyń qylmysqa kináli ekendigine dálel retinde paıdalanǵan. Qazaqstandyq azamatqa qatysty úkim shyqty. Dýbaı sot bıliginiń baspasóz qyzmeti habarlaǵandaı, QR azamaty eki myń dırham (550 AQSh dollary) kóleminde aıyppul tólep, úsh aı qamaqta bolady. Sodan keıin arab elinen syrtqa shyǵarylady. Qylmystyq is bastalǵannan bastap Dýbaıdaǵy jáne BAÁ soltústik ámirlikterindegi QR Bas konsýldyǵy tergeý men sot talqylaýy barysyn baqylady. Olardyń tarapynan keleńsiz jaǵdaıǵa tap bolǵan otandasymyzǵa qoldan kelgenshe materıaldyq-turmystyq kómek kórsetildi.