Dýbaı burynǵy tirligine qaıta orala bastady – Oljas Baıdildınov

<p>ASTANA. KAZINFORM &ndash; Birikken Arab Ámirlikteri ekpini qatty nóser jaýynnan endi esin jııa bastady. Beınejazbalardan qazaqstandyq týrısterdiń súıikti qalasyna aınalǵan Dýbaıdyń keıbir aýdandary sý astynda qalyp, áýejaıdaǵy ushaqtardyń sýda qalqyp júrgenin kórýge bolady. Tabıǵı apat kezinde osy shaharda bolǵan otandasymyz, munaı-gaz salasynyń sarapshysy, energetıka mınıstriniń eks-keńesshisi Oljas Baıdildınovke habarlasyp, qazirgi ahýaldy surap bilgen edik.</p>

Onyń aıtýynsha, nóser jaýyn Dýbaıyń keıbir aýdandarynda ǵana tirkelgen.

«Biz Dýbaı Marına aýdanyna aıaldadyq. Seısenbi kúni keshki ýaqytta kelgende eshteńe sezilmedi. Múmkin bul aýdan bıiktikte ornalasyp, sý kanalǵa qaraı aǵyp ketetin shyǵar. Beınejazbalardan ózge aýdandar kádimgideı zardap shekkenin ańǵarýǵa bolady. Jol-kólik oqıǵalary tirkeldi, sýǵa ketken kólikter de boldy. Bul avtomobılder túbinde Qazaqstanǵa keletin shyǵar. Árıne, jańalyqtardan «sumdyq» kadrlardy kórsetedi ǵoı. Qazir jaǵdaı turaqtala bastady», - deıdi ol agenttik tilshisine bergen suhbatynda.

Oljas Baıdildınov keıbir bıznes-ortalyq, qonaqúıdiń parkıngi jáne jertólelerinde áli kúnge deıin sý sorý jumystary jalǵasyp jatqanyn aıtty.

«Iıa, bul – qala úshin úlken sıgnal boldy. Qoǵamdyq kólikter, metro óz jumysyn toqtatty. Júktemesi kóp bolǵandyqtan ba, taksı qyzmeti múlde istemedi. Jol-jónekeı kólikterdi toqtatyp kórip edik, toqtamady. Sebebi, Dýbaıda taksı qyzmetin usyný úshin arnaıy qujat talap etiledi. Zań buzylsa, aıyppul salynady. Dýbaıdaǵy dástúrli oıyn-saýyq ortalyqtarynyń jumysy áli jandanǵan joq. Bir-eki jerge barǵymyz kelgen, jabyq boldy. Áýejaılarda keıbir reıster toqtatylǵan. Joldarda áli sý bar. Búginde kóp jerde qalpyna keltirý jumystary júrgizilip jatyr», - dedi Oljas Baıdildınov.

Onyń aıtýynsha, teńiz jaǵasynda ornalasqan qala úshin mundaı tabıǵı apattardyń tirkelýi – zańdylyq.

«Bul aımaqta tropıkalyq jaýyndardyń jıi bolýy tańqalarlyq jaǵdaı emes. Bul – sońǵy jyldardaǵy iri apat shyǵar. Óz basym Oral qalasynan bolǵandyqtan, mundaı tabıǵat qubylysyn úrke qabyldadym deı almaspyn. Sebebi, mundaı jaǵdaıda ne isteý kerek ekenin jaqsy bilemin. Qaýipsizdik sharalaryn saqtadym. Bastysy, baılanys úzilgen joq. Maǵan sát saıyn Qazaqstandaǵy týystarym, dostarym, áriptesterim jazyp, jaǵdaıymdy, Dýbaıdaǵy ahýaldy surap jatty. Jalpy, qazir Dýbaı burynǵy tirligine qaıta orala bastady. Qazaqstandyq ári ózge de eldiń týrısteri úshin alańdaıtyndaı problema joq», - dedi O. Baıdildınov.

Esterińizge salsaq, Parsy shyǵanaǵy elderinde nóser jańbyr jaýyp, ol sý tasqyny men kólikterdiń toqtap qalýyna sebep boldy. Tabıǵı apattan 20 adam qaıtys boldy, olardyń kóbi Omanda. Dýbaı áýejaıy sý astynda qaldy.