DSU-nyń mınıstrlik konferentsııasy Qazaqstanda ótetindigine úmit artamyz - EO Elshisi

NUR-SULTAN. QazAqparat - 2021 jyly Qazaqstanda Dúnıejúzilik saýda uıymynyń 12-shi mınıstrlik konferentsııasy ótetindigine úmit artamyz. Bul týraly Ortalyq Azııadaǵy Ready4Trade baǵdarlamasy jónindegi konferentsııa barysynda Qazaqstandaǵy Eýropalyq odaq Elshisi Sven-Olov Karlson aıtty, dep habarlaıdy QazAqparat tilshisi.

«Ready4Trade baǵdarlamasynyń Ortalyq Azııada bastalýyn sátti jáne ýaqytyly iske qosyldy dep sanaımyn. Óıtkeni bul bizge aımaqtyq ıntegratsııany, turaqtylyq pen órkendeýdi arttyratyn turaqty saýda saıasatyn júrgizýge múmkindik beredi. COVID-19-dan keıin búkil álemniń daıyndyǵyn qamtamasyz etip jatqan ýaqytta bul odan ári ózekti bola túsetin Eýropalyq Odaqtyń Ortalyq Azııaǵa arnalǵan strategııasynyń negizgi tiregi bolyp sanalady», - dedi ol konferentsııa barysynda.

Sonymen qatar EO Elshisi tsıfrlandyrý ekonomıkalyq ósimdi jedeldetý, ınklıýzıvti saýda-sattyqty qamtamasyz etý jáne jumys oryndaryn qurýǵa járdemdesý úshin barynsha mańyzǵa ıe bolyp kele jatqanyn atap ótti.

«Osyǵan oraı Dúnıejúzilik saýda uıymynyń jańa talaptaryna saı keletin elektrondy saýda-sattyq týraly jalpy qamtymdy zańnama ázirleýde Qazaqstanǵa qoldaý kórsetý barysynda bizdiń joba zor úles qosatyn bolady. Qazaqstannyń DSU-da mańyzdy rólge ıe bolýǵa umtylysyn joǵary baǵalaımyz. Sonymen qatar DSU-nyń 12-shi mınıstrler kezdesýin ótkizýin taǵatsyzdana kútemiz. Biz Qazaqstan ony 2021 jyly qabyldaı alady dep sanaımyz», - dedi Sven-Olov Karlson.