DSU-nyń 12-shi mınıstrlik konferentsııasy Qazaqstannyń tóraǵalyǵymen ótedi

NUR-SULTAN. QazAqparat - 2021 jylǵy 30 qarasha - 3 jeltoqsan aralyǵynda Jenevada Qazaqstan Respýblıkasynyń tóraǵalyǵymen DSU-nyń 12-shi mınıstrlik konferentsııasy ótedi. Bul týraly QR Saýda jáne ıntegratsııa mınıstrliginen málim boldy, dep habarlaıdy QazAqparat.

DSU Bas keńesiniń sheshimine sáıkes, Qazaqstan Respýblıkasynyń Saýda jáne ıntegratsııa mınıstri Baqyt Sultanov DSU-nyń 12-shi Mınıstrlik konferentsııasynyń tóraǵasy bolyp saılandy.

Mınıstrlik konferentsııa DSU-nyń joǵary basqarýshy organy bolyp sanalady, onyń quzyretine kópjaqty saýda kelisimderi aıasyndaǵy barlyq máseleler boıynsha sheshimder qabyldaý, onyń ishinde halyqaralyq saýdany retteıtin jańa erejeler men dıstsıplınalardy kelisý jáne bekitý quqyǵy kiredi.

DSU-nyń 12-shi Mınıstrlik konferentsııasynda DSU músheleri talqylaıtyn negizgi máseleleri retinde mynalar belgilendi:

1) barlyq elder úshin vaktsınalar men medıtsınalyq taýarlarǵa qoljetimdilikti qamtamasyz etý;

2) balyq aýlaýdy sýbsıdııalaý jónindegi kelissózderdiń aıaqtalýy;

3) aýyl sharýashylyǵy máseleleri jónindegi kelissózder boıynsha progreske qol jetkizý;

4) DSU-nyń daýlardy sheshý tetigin qalpyna keltirý.