DSU mınıstrlik konferentsııasynyń ótetin ýaqyty qarasha aıyna aýystyryldy

NUR-SULTAN. QazAqparat - 1 naýryzda Jeneva qalasynda (Shveıtsarııa Konfederatsııasy) jańadan taǵaıyndalǵan bas dırektor N.Okondjo-Iveala qatysýymen Dúnıejúzilik saýda uıymy Bas keńesiniń otyrysy barysynda 2021 jylǵy qarashada Jenevada DSU-nyń 12-shi mınıstrlik konferentsııasyn (MK-12) ótkizý týraly sheshim qabyldandy, dep habarlaıdy QazAqparat QR Saýda jáne ıntegratsııa mınıstrligine silteme jasap.

DSU Bas keńesiniń tóraǵasy, Jańa Zelandııanyń Elshisi D.Ýolkerdiń aqparaty boıynsha, DSU múshelerimen konsýltatsııalar barysynda koronovırýs pandemııasyna jáne jańa shtamdardyń paıda bolýyna baılanysty 2021 jylǵy 21-24 maýsymda Nur-Sultan qalasynda MK-12 ótkizýdiń múmkin emestigi atap ótildi.

Bul rette DSU músheleri osy jahandyq is-sharany 2021 jyldyń sońyna aýystyrýdyń jáne ony Qazaqstannyń tóraǵalyǵymen Jenevada ótkizýdiń oryndylyǵy týraly pikir bildirdi. Bul usynysty DSU Bas keńesi konsensýspen qabyldady.

«DSU-nyń birqatar múshesi MK-12 ótkizýdiń jańa merzimderi men orny boıynsha qabyldanǵan sheshim alǵa jasalǵan úlken qadam bolyp tabylatynyn jáne uıym úshin basty mánge ıe ekenin atap ótti. DSU janyndaǵy Turaqty Ókilder Qazaqstanǵa ashyqtyǵy, ıkemdiligi jáne DSU-ǵa múshe barlyq elderdiń múddesi úshin Jenevada MK-12 ótkizýge keliskeni úshin, sondaı-aq is-sharany ótkizý ornynyń ózgerýine qaramastan MK-12 tóraǵasy bolýǵa daıyn ekeni úshin alǵys bildirdi», delingen habarlamada.

Qazaqstan delegatsııasy DSU-nyń múshelerine bizdiń elimizdiń 2020 jyly Nur-Sultanda MK-12 qabyldaý týraly usynysyn, sodan keıin jahandyq koronavırýs pandemııasyna baılanysty MK-12-ni 2021 jyldyń maýsymyna aýystyrý týraly usynysyn biraýyzdan qoldaǵany úshin alǵys bildirdi. Sonymen qatar, COVID-19 pandemııasynan týyndaǵan saqtalyp otyrǵan belgisizdik pen shekteýlerdi eskere otyryp, Qazaqstan DSU-ǵa múshe elderdiń bıyl jyldyń sońynda Jenevada MK-12 ótkizýdiń oryndylyǵy týraly pikirimen kelisip, MK-12-ge tóraǵalyq etýge daıyndyǵyn rastady.