DSM jalǵan vaktsınalaý pasportyn satýshylarmen qalaı kúresip jatyr
«Keı adamdar vaktsınalaý týraly elektrondy pasport satyp alýǵa da ótinish bildirgen. Jeke azamattar da áleýmettik jelilerge jáne densaýlyq saqtaý mınıstrligine júginip, vaktsınalaý pasportyn satý faktileri bolǵanyn aıtty. Biz óz tarapymyzdan aqparattyq júıe turǵysynan derekterdiń durystyǵyna qaraımyz. Qalaı bolǵanda da medıtsına uıymynyń qyzmetkerleri derekterdi aqparattyq júıege engizedi. Bul – olardyń jaýapkershiligi. Sondaı-aq, jergilikti atqarýshy organdar deńgeıinde kim jáne qalaı satqanyn anyqtaý boıynsha jumys júrgizilýde. Ázirge búkil el boıynsha málimet jınaqtaǵan joqpyz», - dedi QR DSM elektrondyq densaýlyq saqtaýdy damytý departamentiniń dırektory Beıbit Esenbaev tilshilerge bergen suhbatynda.
Onyń aıtýynsha, keı azamattar qandaı da bir medıtsına qyzmetkerlerine (shyn máninde medıtsınalyq uıymdarda jumys isteıtin) júginetin jaǵdaılar da bolady. Olar syıaqyǵa derekterdi aqparattyq júıege engizýdi suraıdy.
«Munda aıyrmashylyǵyn tabý (vaktsınalaý pasportynyń - red.) múmkin emes. Óıtkeni, vaktsınany jasaǵan dárigerge aqparattyq júıe zańdy túrde qoljetimdi jáne osy derekterdi engize alady. Bul da – onyń medıtsınalyq uıymnyń qyzmetkeri retindegi jaýapkershiligi. Jalǵan derekterdi engizgeni úshin de belgili bir jaýapkershilik qarastyrylǵan», - dedi maman.
Departament dırektory jalǵan pasporttarǵa qatysty aqparattyq júıede derekterdi kim, qashan júrgizgeni tekserilip jatqanyn aıtty. Qate aqparat engizý faktileri medıtsına uıymdary men densaýlyq saqtaý basqarmasy deńgeıinde de anyqtalýǵa tıis.
«Jergilikti jerlerde adamdarǵa vaktsınanyń shynymen salynyp jatqanyn tekserý kerek. Qazir emshara kabınetine kamera ornatý boıynsha talaptar joq, biraq biz bul máseleni qarastyryp jatyrmyz», - dep jaýap berdi B.Esenbaev
Beıbit Esenbaev elektrondy úkimettiń mobıldi qosymshasynda vaktsınalaýdyń elektrondy pasporty jańartylyp, formasy ózgeretinin eske saldy.
«Vaktsınalaý pasporty buryn úsh tilde úsh bet bolatyn. Qazir úsh tilde aqparat beriletin bir bet bolady. Sondaı-aq, azamattyń jeke málimeti týraly aqparatty – tólqujat nómiri, týǵan jylyn jáne QR-kod qosamyz. QR-kodty skanerlep, Densaýlyq saqtaý mınıstrliginiń Memlekettik resýrsyna kirýge bolady, onda osy elektrondy pasporttyń túpnusqa nemese jalǵan ekenin tekserýge bolady», - dep atap ótti Beıbit Eńsebaev.