DSM usynysy boıynsha Atyraý qalasyna ushýǵa shekteý qoıyldy

NUR-SULTAN. QazAqparat - Búginnen bastap birqatar qalalarǵa áýe qatynasy jandandy, dep habarlaıdy QazAqparat Azamattyq avıatsııa komıtetine silteme jasap.

Qazaqstan Respýblıkasy aýmaǵynda koronavırýstyq ınfektsııanyń paıda bolýy men taralýyna jol bermeý jónindegi vedomstvoaralyq komıssııanyń sheshimine sáıkes, QR Densaýlyq saqtaý mınıstrliginiń usynystaryn eskere otyryp, 13 mamyrdan bastap Nur-Sultan men Almaty qalalarynan Shymkent, Aqtaý, Oral, Jezqazǵan, Balhash, Zaısan jáne Úrjarǵa reıster qaıta ashylyp jatyr.

Reıster qazaqstandyq áýe kompanııalarynyń resmı saıtynda jarııalanǵan kestege sáıkes oryndalady.

Sapar kóliktegi bas sanıtar memlekettik dáriger bekitken sanıtarlyq qaýipsizdiktiń joǵary sharalar sharttaryna sáıkes júzege asyrylady:

- jeke qorǵanys jabdyqtaryn paıdalaný (betperde, qolǵap);

- termometrııa, áýe kemesiniń bortyna otyrýǵa deıin áleýmettik qashyqtyqty saqtaý;

- áýejaılar men áýe kemelerdiń kúsheıtilgen dezınfektsııasy.

Jazǵy merzimde áýe tasymaldaryna suranystyń artatynyn nazarǵa alyp, áýe kompanııalary QR Densaýlyq saqtaý mınıstrliginiń sanıtarlyq-karantındik sharalaryn jáne suranysty eskerip, qalalar arasynda qatynaıtyn reıster sanyn ózderi anyqtaıdy.

Búgingi tańda QR Densaýlyq saqtaý mınıstrliginiń usynysyna baılanysty Atyraý qalasyna ushýǵa shekteý qoıylǵan.

Qazaqstan áýe kompanııalary vedomstvoaralyq komıssııanyń sheshiminsiz ushýǵa tyıym salynǵan jerlerge áýe bıletterin satýǵa bolmaıtyny týraly habardar.