Dron, beınekamera, lıft, medıtsınalyq jıhaz — Túrkistanda qandaı kásiporyndar ashylady

<p>TÚRKІSTAN. KAZINFORM &mdash; Túrkistan oblysynda shetel kapıtalynyń qatysýymen 910 mln AQSh dollaryn quraıtyn 6 ınvestıtsııalyq joba bastaldy. Bul týraly óńir ákimi Darhan Satybaldy áleýmettik-ekonomıkalyq damý týraly eseptik kezdesýinde aıtty.</p>

Ákimniń aıtýynsha, Túrkistan oblysynda alǵash ret 100 gektar aýmaqta «Shaǵyn ónerkásiptik park» jobasy ashyldy. Joba aıasynda 308 mlrd teńge ınvestıtsııa tartylyp, 150-den astam óndiristik ǵımarat salynady. Alty myńǵa jýyq jańa jumys orny qurylady jáne bıýdjetke jylyna mıllıardtaǵan salyq túsedi.

«Búgingi tańda 8 óndiris iske qosyldy. Jańbyrlatyp sýarý qondyrǵylaryn shyǵaratyn kásiporyndar ashyldy. Jıhaz, muzdatqysh jáne qurylys zattaryn shyǵaratyn zaýyttar qoldanysqa berildi. Buryn tek shetelden ákelinetin sý únemdeý tehnologııalary búginde Túrkistanda shyǵarylýda. Óndiristik parkte ashylǵan kompanııalardyń sý únemdeý tehnologııalary basqa da oblystarǵa satylýda», — dedi D. Satybaldy Ortalyq kommýnıkatsııalar qyzmetinde ótken eseptik brıfıngte.

Sondaı-aq, oblysqa ınvestıtsııa tartý jáne tájirıbe almasý maqsatynda Qytaı, Reseı, Aýstralııa, Ózbekstan, Qatar jáne Ońtústik Koreıa elderine túrkistandyq kásipkerlerdiń sapary uıymdastyrylyp, alpaýyt kompanııalarmen mańyzdy kelissózder júrgizilgen. 

Nátıjesinde, shetel kapıtalynyń qatysýymen 910 mln AQSh dollaryn quraıtyn
6 ınvestıtsııalyq joba bastaldy. Atap aıtqanda: ónerkásiptik jylyjaı kesheni (Keles aýdany, «Ecoculture Eurasia» JShS II-kezeń); Alıýmınıı buıymdaryn shyǵarý (Ordabasy aýdany, «Central Asia Aluminium»); Ónerkásiptik tońazytqyshtar shyǵarý (Saýran aýdany, «UBC Group»); Kaýstıkalyq soda, pvh, kaltsıı karbıdi, ák-tsement shyǵaratyn zaýyt (Túlkibas aýdany, «Sastóbe ınnovatsııalyq kesheni» JShS); Fosforıt kenderin óńdeý zaýyty (Sozaq aýdany, «Sozaq fosfat» JShS) jáne munaı óńdeý zaýyty (Ordabasy aýdany, «Standard Petrolleum» JShS) ashylmaq.

«Odan bólek, qazan aıynda Túrkistan qalasyna 127 sheteldik kompanııany shaqyryp, 301 mlrd teńge kóleminde 35 memorandýmǵa qol qoıdyq. Osy kelisim arqyly dron, beınekamera, medıtsınalyq jıhaz, turmystyq tehnıka óndiretin kásiporyndardy ashý jumystary bastaldy. Túrkistandyq zaýyttar óz elimizdi jáne eksportty túrli ónimmen qamtamasyz etedi», — dedi Darhan Satybaldy.

Sondaı-aq, aldaǵy ýaqytta ındýstrıaldy aımaqtarda turmystyq tehnıka, ósimdik maıy, gaz qondyrǵylary, lıft qurastyrý, áskerı palatka, sanfaıans, sendvıch paneli jáne sýsyndar óndiretin zaýyttar ashylady. 

Aıta keteıik, oblystaǵy ındýstrııalyq aımaqtarǵa qolaıly jaǵdaı jasaý maqsatynda ındýstrııalyq aımaqtarda elektr energııasy tarıfi 47 teńgeden 25 teńgege deıin arzandatyldy.