Dostyqtyń jol kartasyndaǵy sońǵy aıaldama - Astana
Kitaptardy estafeta boıynsha qaladan qalaǵa aýystyrý «Beıbitshilik pen kelisimniń jol kartasy» respýblıkalyq mega jobasy aıasynda júzege asyrylýda. Halyqtar arasyndaǵy dostyq nyshanynyń fınaldyq sapary Astanada aıaqtalady. Bul týraly astana.kz saıtyna Qazaqstan halqy Assambleıasynyń qalalyq fılıalynan málim etti.
«Beıbitshilik pen kelisimnyń jol kartasy» respýblıkalyq mega jobasy 2012 jyldyń 1 mamyrynda Qazaqstan halqy Assambleıasynyń bastamasymen iske qosylǵan bolatyn. Aktsııa Shyǵys Qazaqstan oblysynan bastaý aldy. Ótken jyly ol elimizdiń shyǵys, soltústik jáne ortalyq aımaqtaryn aralap, 2013 jyly batys jáne ońtústik oblystarǵa saparyn jalǵastyrdy. Sońǵy aıaldama endi 24 sáýirde Qazaqstan halqy Assambleıasynyń mereıtoılyq 20-shy sessııasy ótetin Astana qalasy bolǵaly tur.
Respýblıkamyzdaǵy beıbitshilik pen ultaralyq tatýlyqtyń beınesindeı kitap osy ataýly dataǵa oraı Qazaqstan astanasynda 23 sáýir kúni tapsyrylady. Estafetany Almatydan Astanǵa qorytyndy kezeńde keletin delegatsııa beretin bolady.
Jobanyń talaptary boıynsha árbir aımaq qonaqtardy qarsy alyp, túrli is-sharalar uıymdastyrady. Aǵashtar otyrǵyzyp, oblys ortalyqtarynyń kórikti jerlerin kórsetedi. Kontsertter men flesh-mobtar, dóńgelek ústelder, festıvalder, konferentsııalar uıymdastyrady.
Astana qalasynyń QHA-dan astana.kz saıtyna habarlaǵandaı, kitapty qarsy alatyn Astanadaǵy delegatsııa quramyna 40-qa tarta adam enip otyr. Olardyń qatarynda QR Parlamentiniń Májilis depýtattary, etno-mádenı birlestikterdiń ókilderi men qalanyń basshylyǵy bar. Erejege sáıkes, delegattar «Dostyqtyń jol kartasy» kitabyna ózderiniń tilekteri men QR Prezıdenti Nursultan Nazarbaevtyń memlekettik saıasatyn qoldaıtyn, atap aıtqanda, ultaralyq taýlyq pen saıası turaqtylyqqa baılanysty lebizder jazyp qaldyrýy qajet. «Beıbitshilik pen tatýlyqtyń jol kartasy» jobasynyń qorytyndysy týraly Elbasyna Qazaqstan halqynyń 20-shy sessııasynda baıandalady.