Dostyq úıinde elordalyq QHA-nyń keńeıtilgen otyrysy ótti

NUR-SULTAN. QazAqparat - Nur-Sultan qalasy ákiminiń orynbasary Baqtııar Máken elordalyq Qazaqstan halqy Assambleıasy keńesiniń keńeıtilgen otyrysyna qatysyp, Táýelsizdiktiń 30 jyldyǵy qarsańynda atqarylatyn sharalardy talqylady. Bul týraly qala ákimdiginiń resmı saıty habarlady.

«Bıyl qasterli Táýelsizdik jylnamasynyń jańa paraǵy ashyldy. Bul – bizdiń mańdaıymyzǵa buıyrǵan mereıli mártebe, enshimizge tıgen eren baqyt dep bilemiz.
Nur-Sultan qalasy - Táýelsizdiktiń qaıtalanbas tóltýmasy, elimizdiń rýhanı-mádenı ortalyǵy. Táýelsizdiktiń 30 jyldyǵynda elorda tek saıası-áleýmettik, qarjylyq-ekonomıkalyq minberlerdiń emes, mádenı jáne rýhanı ordaǵa aınaldy», - dedi qala ákiminiń orynbasary.

Sondaı-aq Baqtııar Máken, Memleket basshysynyń Qazaqstan Táýelsizdiginiń 30 jyldyǵyn keń kólemde atap ótý barysynda halyq birligin arttyryp, eldi uıystyrýǵa arnalǵan izgi jobalarǵa basymdyq berýge shaqyrǵanyn atap ótti.

«Búgingi jınalysta men sizderdi aldaǵy jumystyń baǵyttaryn taldaýǵa, birlik pen kelisimniń áleýmettik kapıtalyn nyǵaıtýǵa, etnostar arasyndaǵy ózara is-qımyldyń jańa alańdaryn qalyptastyrýǵa baǵyttalǵan is-sharalardy birlesip uıymdastyrýǵa shaqyramyn. Sizderden syndarly usynystar, paıdaly bastamalar jáne birlesken jemisti jumystar kútemiz», - dedi ákim orynbasary.