Dostyq úıi Qazaqstan halqy Assambleıasy jumysynyń biregeı sımvoly – professor Georgıı Kan

ALMATY. QazAqparat – Almatyda ornalasqan «Dostyq úıi» Qazaqstan halqy Assambleıasy jumysynyń alǵashqy ári biregeı sımvoly. Bul týraly óńirlik kommýnıkatsııalar qyzmetiniń alańynda Qazaqstan koreıleri qaýymdastyǵy tóraǵasynyń keńesshisi, professor, tarıh ǵylymdarynyń doktory Georgıı Kan aıtty, dep habarlaıdy QazAqparat tilshisi.

Spıkerdiń aıtýynsha, 2021 jyly ashylǵan «Dostyq úıinde» 35 etnomádenı birlestik jumys isteıdi.

«Munda jastar dıalogy men shyǵarmashylyq alańdar qyzmetine erekshe nazar aýdarylady. Eń bastysy, Dostyq úıi respýblıkalyq aýqymdaǵy iri is-sharalar ótetin orynǵa aınaldy. Munda túrli áleýmettik jumystar atqarylady, muqtaj jandarǵa kómek kórsetiledi. Ásirese, bul pandemııa, lokdaýn kezeńinde baıqaldy. Assambleıa azyq-túlik, dári-dármek, betperde tasymaldaıtyn mobıldi top qurdy. Mysaly, koreı teatrynda ártister betperde tikti», - dedi Georgıı Kan.

Ol sondaı-aq, Assambleıaǵa bıyl jańa mindetter júktelgenin aıtty.

«Memleket basshysynyń, Parlamenttiń, jergilikti máslıhattardyń kezekten tys saılaýy jarııalandy. Assambleıanyń barlyq tóraǵalary bir komandada jumys isteıdi. Biz ashyq, obektıvti saılaýǵa, senim mandatyna kúsh jumsaıtyn bolamyz», - dedi ol.

Spıker óz sózinde bıyl Qazaqstan men Koreıa Respýblıkasy arasyndaǵy dıplomatııalyq qatynastardyń ornaǵanyna 30 jyl tolatynyn atap ótti.

Aıta keteıik, Almatyda 10 respýblıkalyq jáne 4 óńirlik etno-birlestik bar.