Dostyq-Moıynty ýchaskesinde ekinshi jol qurylysy salynady

NUR-SULTAN. QazAqparat - Dostyq-Moıynty ýchaskesinde ekinshi joldy salý poıyzdar qozǵalysynyń jyldamdyǵyn arttyrýǵa múmkindik beredi. Bul týraly Indýstrııa jáne ınfraqurylymdyq damý mınıstrliginen málim boldy, dep habarlaıdy QazAqparat.

«Dostyq-Moıynty ýchaskesindegi ekinshi joldyń qurylysy «Qýatty óńirler – el damýynyń draıveri» Ulttyq jobasyna engizilgen bolatyn. Negizgi maqsat – «Qytaı-Eýropa-Qytaı» tranzıttik dálizi boıynsha temirjol tranzıttik tasymaldary barysynda elimizdiń basymdyǵyn saqtaý», - delingen mınıstrlik habarlamasynda.

Jobany iske asyrý júkterdi tasymaldaý jyldamdyǵyn arttyrýǵa jáne ótkizý qabiletin 12-den 60 jup poıyzǵa deıin ulǵaıtýǵa múmkindik beredi.

«Sondaı-aq, poıyzdardyń qozǵalys jyldamdyǵyn táýligine 1500 shaqyrymǵa deıin arttyrýǵa jaǵdaı jasap, basqa da aralas salalardyń damýyna qosymsha serpin beredi dep kútilýde. Qurylys jumystaryna shamamen 6 myń adam jumyldyrylatyn bolady», - dep atalyp ótken vedomstvo málimetinde.

Aıta keteıik, ótken jyly Memleket basshysy Qasym-Jomart Toqaev óńirlik deńgeıde básekege qabiletti bolyp qalý úshin temirjol tasymaldaryn arttyrýdy tapsyrdy.

«Joldardyń ótkizý qabiletin arttyrý úshin tar jerlerdi keńeıtý kerek. Osyǵan baılanysty Dostyq-Moıynty temirjol ýchaskesiniń ótkizý qabiletin arttyrý kerek jáne elektr energııasyn kóptep engizý qajet», - dedi Prezıdent.