Dostyq – Moıynty: qurylys keste boıynsha júrip jatyr

ASTANA. QazAqparat - «Qazaqstan Temirjoly» ulttyq kompanııasy Dostyq – Moıynty arasyndaǵy jol qurylysynyń keste boıynsha júrip jatqanyn málimdedi, dep habarlaıdy QazAqparat.

«Dostyq – Moıynty temirjol ýchaskesinde ekinshi joldardy salý Memleket basshysynyń otandyq ónimniń úzdiksiz eksportyn qamtamasyz etý jáne eldiń tranzıttik áleýetin ulǵaıtý jónindegi alǵa qoıǵan mindetterin oryndaý sheńberinde mańyzǵa ıe. Іri ınfraqurylymdyq jobany iske asyrý ýchaske temirjol ınfraqurylymynyń ótkizý qabiletin 5 esege arttyrýǵa múmkindik beredi (táýligine 12-den 60 jup júk poıyzyna deıin)», - dep jazdy kompanııadan.

Dostyq – Moıynty temirjol ýchaskesiniń ekinshi joldarynyń qurylysy bastalǵan sátten bastap «QTJ» UK» AQ 6 aralyqta jer jumystaryn júrgizdi. Sáýir aıynda qurylysshylar jeliniń taǵy 8 ýchaskesine: Taǵynqara – Saıaq, Jaıpaq – Aqshı, Aqshı – Kóktýma jáne t. b. úıindilerdi tógýge kiristi.

«Dostyq-Moıynty ýchaskesinde uzyndyǵy 836 km bolatyn ekinshi joldardy salý kezinde shamamen 19,4 mln. tekshe metr topyraq tógilip, 108 myń tonna rels, 1538 temirbeton shpal jınaǵy tóseletin bolady. 394 jasandy qurylys salý jáne 898 km syrtqy elektrmen jabdyqtaý jelilerin salý kózdelgen.

Jumystardy oryndaý úshin Jaryq, Úshtóbe, Aqtoǵaı, Orta Deresin, Saryqum, Aşyózek, Jaqsybulaq, Beskól stantsııalarynda óndiristik bazalar uıymdastyryldy», - delingen vedomstvo habarlamasynda.