«Dostyq» beketinde elektrondy kezek alý erejesin buzǵandardyń akkaýnttary buǵattaldy

ASTANA. QazAqparat – Qytaımen shekaradaǵy «Dostyq» beketinde elektrondy kezekke qoıylǵan kólikterdiń 63 paıyzy ereje buzǵan paıdalanýshylarǵa tıesili, dep habarlaıdy QazAqparat Memlekettik kirister komıtetiniń baspasóz qyzmetine silteme jasap.

«Memlekettik derekter bazasy arqyly tekseristen qazaqstandyq tasymaldaýshylar ótetindikten, bizde sheteldik tasymaldaýshylar boıynsha basqa bazalarmen ıntegratsııa jasalmaǵan. Tıisinshe, aıla-sharǵy jasaý derekteri tirkelgen. Máselen, birneshe sheteldik kompanııanyń ókilderi memlekettik nómirlerdi ózgertý, ıaǵnı birinshi jaǵdaıda syzyqsha qoıyp, ekinshi ret bos oryn qaldyrý sekildi bir nómerdi túrlendirý arqyly kezek alǵan. Osylaısha, olar óz klıentteriniń kóligin jyljytý múmkindigine ıe bolǵan», - deıdi QR QM «Aqparattyq-esepteý ortalyǵy» AQ bas mamany Azamat Qurmanov.

Taldaýlar kórsetkendeı, servıs iske qosylǵaly beri eki aı ishinde «Dostyq» beketi arqyly shekaradan 1 759 kólik ótken, onyń 1 108-i nemese 63 paıyzy – osy paıdalanýshylardyń kólikteri.

«Paıdalanýshy kelisimshartyn buzǵany úshin olardyń akkaýnttary buǵattalǵan. Eger bronda kórsetilgen nómirli fýralar shekaraǵa kelse, olar óte alady, biraq atalǵan paıdalanýshy kezekti ózgertý nemese qandaı da bir brondy jyljytý quqyǵynan aıyrylady.

Kelisimshartqa saı, ony buzǵan paıdalanýshy akkaýnty 90 kúntizbelik kún ótkennen keıin buǵattan shyǵarylady nemese sottyń sheshimi boıynsha oǵan deıin júzege asýy múmkin. Materıaldar quqyq qorǵaý organdaryna beriledi», - deıdi Azamat Qurmanov.

Aıta ketsek, elektrondy kezek servısi Qazaqstan-Qytaı shekarasyndaǵy «Dostyq», «Nur-Joly» ótkizý beketterinde engizilgen.

Osy aıdyń aıaǵyna deıin Ózbekstan jáne Túrikmenstanmen shekarada da júıeni qoldanysqa engizý jumystary aıaqtalmaq.