Dostyqty tý etken «Birlik» ansambliniń tuńǵysh kontserti ótti
Dýmandy keshke Mádenıet jáne aqparat mınıstri Aıda Balaeva, Májilis jáne Senat depýtattary, dıplomatııalyq korpýs, Qazaqstan halqy Assambleıasy men etnomádenı birlestikterdiń ókilderi qatysty.
Aty aıtyp turǵandaı, «Birlik» álem halyqtarynyń mádenıetin nasıhattaıdy. Mádenı ujym álem halyqtarynyń bılerin zerdeleıtin jáne kásibı deńgeıde oryndaıtyn halyqaralyq ujymdy qalyptastyrý, óskeleń urpaqty basqa ulttardyń óneri men mádenıetimen tanystyrý, sondaı-aq qoǵam sanasynda mádenı kod retinde kópultty Qazaqstan halqynyń birligin nyǵaıtý maqsatynda qurylǵan.
Ár halyqtyń áni men bıin aspaptyq súıemeldeýmen oryndaıtyn halyqaralyq ujymnyń quramyna elimizde turatyn etnos ókilderiniń arasynan úzdik 20 bıshi men mýzykant iriktelip alynǵan.
Ujymnyń erekshe ári eksklıýzıvti bı kompozıtsııalaryn qoıýǵa Reseı, Tatarstan, Ózbekstannan shaqyrylǵan kórnekti shetel mamandary jáne Qazaqstannyń eńbek sińirgen qaıratkerleri atsalysqan. Olardyń qatarynda Ózbekstannyń eńbek sińirgen qaıratkerleri Evelına Protasova, Odılbek Orıpov, Reseıdiń eńbek sińirgen ártisi, Reseıdiń eńbek sińirgen óner qaıratkeri, Omby memlekettik orys halyq horynyń bas baletmeısteri Zýfar Tolbeev, Tatarstan Respýblıkasynyń Halyq ártisi, Tatarstan Respýblıkasynyń Memlekettik án-bı ansambliniń pedagog-horeografy Lıaısan Hametova, otandyq horeograftar Aıda Bekisheva, Anel Marabaeva, Jańataı Qojabek bar.
– «Birlik» ansambliniń ereksheligi bizdiń elde turatyn etnos ókilderiniń ártisterinen jasaqtalyp otyr. Otanymyzdaǵy ár halyqtyń óneri men mádenıetin, folkloryn, tipti umytýǵa aınalyp bara jatqan qundylyqtaryn kórsetýdi kózdedik. Olardyń árqaısysynyń áni men bıinen bólek aspaptary – óz aldyna bir tóbe. Sonymen qatar elimizdegi etnostardan quralǵan ansambl arqyly rýhanı tutastyqty áıgilegimiz keledi. Ansamblde ánshiler, bıshiler, ártúrli aspapta oryndaýshylar óner kórsetedi. Ónerpazdardy biz nebári bir jarym aıdyń ishinde iriktep aldyq, - deıdi jobanyń rejısseri Qarlyǵash Ájıeva.
Ansamblde qazaq qyzdarymen qatar ózge ult ókilderi de barshylyq. Atap aıtqanda, orys, káris, ózbek, taǵy basqa etnos ókilderi bar. Bulardyń bári astanalyq emes, basqa da aımaqtardan iriktelgen.
Osylaısha, kontsertte kórermender orystyń qyzy ózbek bıin, ýkraın qyzy káris bıin, tatar, orys qyzy qazaqtyń bıin bılegenin tamashalaı aldy. Tek qana bı emes, ártúrli janr qamtyldy. Án, mýzyka, hor, etnostardyń ulttyq aspaptary nebári 15 nómirge syıyp, ónerpazdar jınalǵandardyń ystyq yqylasyna bólendi.
Aıta keteıik, Qazaqstanda turatyn etnostardyń folkloryn nasıhattaý maqsatynda repertýar jańaryp, damytý jumystary turaqty túrde júrgiziledi. Ansambl quramynda jastarmen qatar alys-jaqyn shetelderdegi Dostyq elshileri atanǵan Qazaqstannyń jetekshi oryndaýshylary da bolady.