«Dostyq» úıleri gýmanıtarlyq kómek qabyldaý pýnkterine aınaldy

<p>ASTANA. KAZINFORM &ndash; Qazaqstan halqy Assambleıasy tarapynan 10 myńǵa jýyq volonter sý tasqynymen kúreske atsalysyp jatyr. Tolyǵyraq Parlament Senatynyń depýtaty, sý tasqynynan zardap shekkenderge kómek kórsetý jónindegi Qazaqstan halqy Assambleıasy respýblıkalyq shtabynyń ókili Álisher Satvaldıev aıtyp berdi.</p>

«Sý tasqynynan zardap shekken óńirlerde Qazaqstan halqy Assambleıasy tarapynan qurylǵan respýblıkalyq jáne óńirlik shtabtar jumysyn jalǵastyrýda. «Júrekten júrekke» arnaıy jobasy aıasynda barlyq óńirdegi «Dostyq» úılerinde volonterler ortalyqtary jáne gýmanıtarlyq kómek qabyldaý pýnktteri qyzmet atqarýda. Búginde respýblıka boıynsha 50-ge jýyq pýnkt bolsa, Astana qalasynda 9 kómek qabyldaý pýnkti bar», - dedi Álisher Satvaldıev Ortalyq kommýnıkatsııalar qyzmeti alańynda ótken baspasóz máslıhatynda. 

Halyq qalaýlysynyń málimdeýinshe, Qazaqstan halqy Assambleıasy tarapynan kómek, qoldaýǵa 10 myńǵa jýyq volonter jumyldyryldy. 

«Olar gýmanıtarlyq kómek retinde kelgen zat, taýarlardy jınap, suryptap sý basqan óńirlerge jiberý jumysyn atqaryp jatyr. Sonymen qatar eriktiler dambalar qurý jumysyna da atsalysýda. Qazirgi ýaqytta óńirlik etno-mádenı birlestikteri 227 tonnadan astam azyq-túlik pen qajetti zattar sý tasqynyna ushyraǵan óńirlerge joldandy. Jalpy somasy 276,5 mln teńgege gýmanıtarlyq kómek kórsetildi. Odan bólek, 24 arnaıy tehnıka men 43 júk kóligi jumyldyryldy. Tasqyn sýdan zardap shekken óńirlerge gýmanıtarlyq kómektiń sońǵy legi Shymkent qalasynan Atyraý oblysyna, Jambyl oblysynan Atyraý jáne Qostanaı oblysyna jóneltildi. Aldaǵy ýaqytta Jambyl, Túrkistan oblysy men Almaty, Shymkent qalasynan Atyraý, BQO jáne Aqtóbe oblysyna jınalǵan kómekti jóneltý úshin daıarlyq jumystary júrip jatyr», - deıdi ol.