Dossor aýylynyń turǵyndary mınıstrge shaǵymyn jetkizdi

ASTANA. QazAqparat – Ulttyq ekonomıka mınıstri Atyraý oblysy Dossor aýylynyń turǵyndarymen kezdesti, dep habarlaıdy QazAqparat mınıstrliktiń baspasóz qyzmetine silteme jasap.

Kezdesý barysynda turǵyndar joldardy qalpyna keltirý, kóshelerdi jaryqtandyrý, halyqty baspanamen qamtý máselelerin kóterdi. Olardyń aıtýynsha, eski jáne apatty jaǵdaıdaǵy, sondaı-aq órtenip ketken úılerdiń ornyna jańa baspana salýǵa qarjy bólý kerek. Jergilikti bıýdjet pen demeýshilik qarajaty esebinen salynǵan keıbir úılerdiń sapasy tómen: úılerdiń tóbesinen sý aǵyp, syrtqy qaptamasy buzylyp, túsip jatyr.

Álibek Qýantyrov oblys ákimdigimen birlesip, úılerdi salý jáne jóndeý shyǵyndaryn qarjylandyrý ádisterin qarastyratynyn aıtty. Budan bólek, jergilikti kadrlardy jumysqa ornalastyrý máselesi kóterildi. Turǵyndar iri ulttyq kompanııalarǵa jumysqa ornalasý múmkin emes dep shaǵymdandy: jumysshylardy basqa qalalarda ornalasqan rekrýtıngtik kompanııalar jaldaıdy. Sondyqtan jergilikti turǵyndar jumyssyz otyrýǵa májbúr.

UEM basshysy kadrlardy jumysqa ornalastyrýda basymdyq múmkindiginshe jergilikti mamandarǵa berilýi tıis degen pikir bildirdi. Onyń aıtýynsha, mamandandyrylǵan kadrlar bolmaǵan jaǵdaıda jergilikti turǵyndardy daıyndyq kýrstarynan ótkizip, jumysqa ornalastyrýǵa bolady.

Dossor aýyly turǵyndaryn alańdatyp otyrǵan taǵy bir másele – tuzdy sorlardyń ashyq jatýy. Ol adam densaýlyǵyna óte zııan deıdi jurtshylyq. Sondyqtan turǵyndar tuzdy sordy joıýdy talap etedi.

Á.Qýantyrov barlyq másele jergilikti bılik jáne tıisti memlekettik organdarmen birlesip qarastyrylatynyn atap ótti.