Dosaev: Syrtqy ekonomıkalyq qyzmettiń adal qatysýshylaryna qysym jasalmaıdy
«Qylmystyq kiristi zańdastyrýǵa jáne terrorızmdi qarjylandyrýǵa qarsy is-qımyl jónindegi jumys aıasynda Qazaqstan 2022 jyly alda bolatyn Kiristerdi jylystatýǵa/terrorızmdi qarjylandyrýǵa qarsy is-qımyl (KJ/TQQ) zańnamasy men ulttyq júıesiniń halyqaralyq standarttar men FATF talaptaryna tehnıkalyq sáıkestigin ózara baǵalaýǵa belsendi daıyndyqty jalǵastyrady. Ol úshin kúmándi transshekaralyq operatsııalarǵa qoldanylatyn qarjy monıtorıngi sharalary kúsheıtildi. Osy jylǵy 10 qańtarda Ulttyq banktiń, Qarjy monıtorıngi agenttigi men Qarjy naryǵyn retteý jáne damytý agenttiginiń birlesken buıryǵy qabyldandy. Onda kúsheıtilgen qarjy monıtorıngine jatatyn transshekaralyq operatsııalardyń tizbesi bekitilip, operatsııalardy júrgizýge berilgen ótinimder boıynsha is-qımyl algorıtmi belgilendi», - dedi ol Prezıdenttiń bıznes ókilderimen kezdesýinde.
Onyń aıtýynsha, ekinshi deńgeıdegi bankter úshin birlesken buıryqtyń normalaryn túsindirý Qazaqstan qarjygerleri qaýymdastyǵynyń qatysýymen jedel túrde júrgizildi.
«Úzdik álemdik praktıkany eskere otyryp, ekinshi deńgeıdegi bankter KYC (know your client) qaǵıdattary sheńberinde táýekeli joǵary operatsııalardy jan-jaqty zerdeleý jumysyn kúsheıtti. Aǵymdaǵy parlamenttik sessııanyń sońyna deıin qarjy monıtorıngi sharalaryn odan ári kúsheıtýge jáne Ekonomıkalyq yntymaqtastyq jáne damý uıymynyń (EYDU) standarttary boıynsha qarjy júıesine KYC qaǵıdattaryn tolyq engizýge baǵyttalǵan zańnamalyq túzetýler blogyn ázirleý jáne qabyldaý qajet dep esepteımiz. Sizdiń tapsyrmańyzǵa sáıkes rezıdentter men beırezıdentterdi qosa alǵanda, syrtqy ekonomıkalyq qyzmettiń adal qatysýshylarynyń quqyqtaryna qysym jasalmaıdy jáne halyqaralyq operatsııalardy júrgizýine shek qoıylmaıdy», - dedi Erbolat Dosaev.