Dosaev: Bank sektorynyń jıyntyq aktıvteri 2021 jyly 37,6 trln teńge boldy
«Qarjy júıesiniń turaqtylyǵy, birinshi kezekte, bank sektorynyń ornyqtylyǵymen aıqyndalady. 2020 jyldan bastap Qarjy naryǵyn retteý jáne damytý agenttigi (QNRDA) Ulttyq bankpen birlesip qarjy sektoryn qalpyna keltirý, aktıvter sapasyn baǵalaý (AQR) jáne bıznes-protsester men táýekel menedjmentin jaqsartý jónindegi túzetý is-sharalary boıynsha jumys júrgizdi. Ýaqtyly qabyldanǵan birlesken sharalarǵa baılanysty qalyptasqan ornyqtylyq býferi búgingi kúni klıentter qarajatynyń saqtalýyn qamtamasyz ete otyryp, halyqqa jáne bızneske qyzmet kórsetý úshin ekinshi deńgeıdegi bankterdiń operatsııalyq qyzmetin úzdiksiz júzege asyrýǵa múmkindik beredi», dedi ol Memleket basshysynyń bıznes ókilderimen kezdesýinde.
Dosaevtyń dereginshe, bank sektorynyń jıyntyq aktıvteri 2021 jyly 6,5 trln teńgege ósip, 37,6 trln teńge boldy. Bankterdiń menshikti kapıtaly 2021 jyldyń sońynda 4,5 trln teńgege jetti. Ekinshi deńgeıdegi bankterde birinshi deńgeıdegi menshikti kapıtaldyń jetkiliktilik koeffıtsıenti 19,3 paıyz boldy. Bul eń tómengi retteýshilik talaptardan 3 ese artyq.
«Ótimdi aktıvter 1,5 trln teńgege ósip, 16,2 trln teńge boldy, bul bank sektorynyń jıyntyq aktıvteriniń 43 paıyzyn quraıdy. Ótimdilik kólemi qajetti deńgeıden 4 ese asady», dedi Ulttyq bank tóraǵasy.