Dos Kóshim: Biz daıarlaǵan doktrına qazirgi qoǵamǵa saı dep oılaımyn

ASTANA. Sáýirdiń 29-y. QazAqparat /Rýslan Ǵabbasov/ - Biz daıarlaǵan doktrına qazirgi qoǵamǵa saı dep oılaımyn. Bul týraly Astanada Qazaqstannyń El birligi doktrınasynyń qorytyndy nusqasynyń tanystyrylymyna arnalǵan baspasóz máslıhatynda «Ult taǵdyry» qoǵamdyq birlestiginiń tóraǵasy Dos Kóshim málim etti,

dep habarlaıdy QazAqparat.

«Qańtardyń 29-yndaǵy alǵashqy kezdesýde biz talap qoıýǵa emes, birlesip jumys isteýge keldik. Osy turǵyda jumys toby qurylyp, sonyń aıasynda jumystyń nátıjesin shyǵardyq»,-dedi Dos Kóshim.

Azamattyq qoǵam men bılik birge otyryp óte mańyzdy, óte kúrdeli jáne óte qıyn memlekettik deńgeıdegi qujat ázirlegenin aıtyp ótken ol, «memlekettik turǵydaǵy ulttyń, ultaralyq máseleniń bolashaǵyn belgileıtin qujatty dúnıege ákeldi. Osy ýaqytqa deıin bundaı jaǵdaı bolǵan joq»,-dedi.

«Jumys ońaı bolǵan joq. Komıssııada túrli adamdar boldy. Atap aıtqanda solardyń barlyǵy biraýyzdan qujatty qabyldaǵany shyndyǵynda da bizdiń tókken terimizdiń arqasy. Keıinnen buqara tereńirek tanysqannan keıin ózderiniń baǵasyn bere jatar. Sondyqtan onyń biraýyzdan qabyldanýy bizdiń jumysqa berilgen baǵa dep oılaımyn», - dedi D. Kóshim.

Doktrınanyń mátinine toqtalǵan ol, «alǵash shyqqan doktrına men bizdiń daıyndaǵan qujatty alyp qarasańyzdar, sońǵy doktrınanyń mátini men qurylymy múldem ózgerdi. Atap aıtqanda, bul doktrınalyq deńgeıde qurylymdaldy», dedi.

«Biz kóp izdendik. Ekeýin qosyp edik, odan esh nárse shyǵa qoımady. Tipti ol doktrınaǵa uqsamaı ketti. Sondyqtan shyndyǵynda naqty doktrınanyń jasalýynyń ózi de alǵashqy jańalyq sekildi boldy. Árıne, árkimniń kóńilinde taǵy da birdeńe qaldy. ıAǵnı, bunda ózge usynystar men tolyqtyrýlar engizýge qatysty. Biraq, qazirgi bıliktiń kózqarasy, qazirgi bizdiń qoǵamymyzdyń qabyldaý deńgeıin, búgindegi qazaqtyń dilin - barlyǵyn aınalyp kelgende, bizdiń daıarlaǵan doktrına qazirgi qoǵamǵa saı dep oılaımyn», - dep atap ótti D. Kóshim.