Dopty hokkeı: «Aqjaıyqtyń» oıynshysy bir maýsymda 100-ge jýyq gol soqty

<p>ORAL. KAZINFORM — Dopty hokkeıden joǵary lıga komandalary arasynda búkilreseılik jarystyń 2023-2024 jylǵy maýsymy qorytyndysynda «Aqjaıyq» shabýylshysy, reseılik Maksım Pahomov úzdik surmergen atandy.</p>

«Aqjaıyq» sport klýbynan málim etkenindeı, M.Pahomov ótken maýsymda 96 gol soǵyp, 39 nátıjeli pas berdi. Bul kórsetkish jóninen Maksım joǵary lıgada aldyna jan salmady.

«Aqjaıyq» komandasynyń kapıtany Maksım Ótebalıev 40 gol, 46 nátıjeli paspen ekinshi orynǵa ıe boldy. Bul M.Ótebalıev úshin eń úzdik maýsymdardyń biri boldy.

Taǵy bir reseılik Artem Lapshın 34 gol, 14 nátıjeli paspen «Aqjaıyqtyń» jeńisterine óz úlesin qosty. 

Qýanysh Temirálın men Samat Amanshın kóbine qorǵanysta oınasa da, shabýylǵa da der kezinde qosylyp otyrdy. Qýanyshtyń esebinde 5 gol, 23 nátıjeli pas, Samatta 6 gol, 13 nátıjeli pas bar.

Nıkolaı Shavaldınniń shákirtteri ekinshi topta úzdik úshtikke kirip, fınaldyq týrnırde jetinshi orynnan kórindi.

Eske sala keteıik, budan buryn «Aqjaıyqtyń» maýsymdy iri jeńispen túıindegenin jazǵan bolatynbyz.