Dopty hokkeı: «Aqjaıyq» óz tobynda ekinshi orynǵa kóterildi

<p>ORAL. KAZINFORM &ndash; Dopty hokkeıden joǵary lıga komandalary arasynda búkilreseılik jarysta Oraldyń &laquo;Aqjaıyǵy&raquo; &laquo;Jastar&raquo; stadıonynda &laquo;Maıak&raquo; (Krasnotýrınsk) komandasyn ekinshi ret jeńdi.</p>

Tartysty ótken oıynnyń birinshi taımy 3:3 esebimen teń aıaqtaldy.

Esesine ekinshi kezeńde Nıkolaı Shavaldınniń shákirtteri jaýapsyz bes gol soqty.

Qorytyndy esep — 8:3, «Aqjaıyqtyń» paıdasynda.

Oraldyqtardan reseılik Maksım Pahomov bul joly bir ǵana ret kózge túsip, osy maýsymda on oıynda soqqan gol sanyn 32-ge jetkizdi.

Taǵy bir reseılik Artem Lapshın men Nurbol Bókeshov 2 retten qaqpa kiltin tapsa, sondaı-aq Ershat Amangeldıev, reseılik Ivan Zaharov jáne komanda kapıtany Maksım Ótebalıev bir-bir goldan engizdi.

«Maıaktan» Anton Tıhvınskıı, Aleksandr Shtele, Nıkıta Shorohov mergendik tanytty.

Osy matchtan keıin 24 upaı jınaǵan «Aqjaıyq» týrnır kestesinde óz tobynda ekinshi orynǵa kóterildi.

Batysqazaqstandyqtar kelesi kezdesýlerin 22-23 qańtarda Qazanda «Ak Bars-Dınamo-2» komandasymen ótkizedi.

Eske sala keteıik, budan buryn Oraldyń «Aqjaıyǵy» kósh basyndaǵy komandany tize búktirgenin jazǵan bolatynbyz.