Dopıng daýy: Saýl Alvarestiń jazasy jarııalandy

ASTANA. QazAqparat - AQSh-tyń Nevada shtaty Atletıkalyq komıssııasynyń sheshimimen meksıkalyq boksshy Saýl Alvares dopıng qoldanǵany úshin alty aıǵa sporttan shettetildi, dep xabarlaıdy QazAqparat boxingscene.com saıtyna silteme jasap.

Otyrys barysynda komıssııa músheleri meksıkalyq boksshyny jarty jylǵa sporttan shettetý týraly sheshimdi biraýyzdan qoldady. Jazanyń merzimi aqpannyń 17-sinen bastap esepteledi. Sebebi dál sol kúni Saýl Alvarestiń alǵashqy synamasynan «klenbýterol» atty dopıng tabyldy. Eki kúnnen keıingi synama da oń nátıje kórsetken edi. Odan keıingileri taza bolyp shyqty. Osylaısha, «Kanelo» 17 tamyzǵa deıin barlyq jekpe-jekterden shettetilip otyr.

Sarapshylardyń aıtýynsha, qyrkúıek aıynda onyń Gennadıı Golovkınge qarsy revanshy ótýi ábden múmkin.

Aıta keteıik, Saýl Alvares dopıngpen aqpan aıynda ustalsa da, Nevada shtatynyń Atletıkalyq komıssııasy ony birden shettetken joq. Kásibı bokstyń sarapshylary meksıkalyq juldyz jazadan qutylyp ketedi dep baıbalam saldy. Gennadıı Golovkın de úndemeı otyrmady. GGG meksıkalyq boksshynyń alǵashqy jekpe-jekte belgisiz dárilerdi qoldanǵanyn jarııalap, sol kezde túsirilgen vıdeony da kórsetti. Osydan keıin Nevada shtatynyń Atletıkalyq komıssııasy Saýl Alvaresti 18 sáýirge deıin barlyq jarystardan shettetti. Golovkın bolsa, 5 mamyrǵa qarsylasty taba almaı, biraz áýrege tústi. Búgin qazaqstandyq boksshy aldaǵy jekpe-jektiń ótetinin resmı túrde jarııalady.