Dóńgelegi jarylǵan kólik aýdarylyp, 20 jastaǵy boıjetken kóz jumdy

TALDYQORǴAN. QazAqparat - Kóliktiń dóńgeleginiń jarylýy Jetisý oblysynda adam ólimine ákep soqty, dep habarlaıdy QazAqparat polıtsııaǵa silteme jasap.

BMW avtokóliginiń 20 jastaǵy júrgizýshisi Almaty-Óskemen tasjolynyń 192-shaqyrymynda rýlge ıe bola almaı qalǵan.

Saldarynan kólik aýdarylyp ketti.

Oqıǵa ornynda 20 jastaǵy jolaýshy qyz kóz jumdy.

Kólik júrgizýshisi men taǵy bir jolaýshy túrli jaraqatpen Saryózek aýrýhanasyna jatqyzyldy.

Jol apaty avtomobıldiń nashar tehnıkalyq jaǵdaıyna, ıaǵnı talapqa saı kelmeıtin dóńgelektiń jarylyp ketýine baılanysty boldy dep boljanyp otyr.

«Qurmetti júrgizýshiler, óz kóligińizdiń tehnıkalyq jaǵdaıyn muqııat qadaǵalaýdy suraımyz. Dóńgelekterdegi «rezeńkeni» der ýaqytynda (jyl maýsymyna sáıkes) aýystyryńyz. Jol erejesi men ruqsat etilgen jyldamdyq rejımin saqtańyz. Avtokólikti basqarý kezinde Siz ózińiz úshin ǵana emes, sonymen qatar jolaýshylardyń, sondaı-aq jol qozǵalysynyń basqa da qatysýshylarynyń ómiri men densaýlyǵy úshin de jaýapty ekenińizdi umytpańyz» dep eskertedi polıtsııa.