Doner ishine telefon jasyryp, ızolıatorǵa ótkizbek bolǵan aqtóbelik ustaldy

AQTÓBE. QazAqparat – Aqtóbe turǵyny tergeý ızolıatorynda otyrǵan dosyna telefon jetkizbek boldy. Ol baılanys quralyn doner ishine jasyrǵan. «Tosyn syı» sálemdemeni tintý kezinde tárkilendi, dep habarlaıdy QazAqparat tilshisi.

Aqtóbedegi Qylmystyq-atqarý júıesi departamentine qarasty №70 mekemesinde sálemdemelerdi tekserý kezinde uıaly telefon tárkilendi. Juqaltyrǵa oralǵan telefon men SIM karta doner ishinen shyqty.

«Aqtóbelik kinásin tolyq moıyndady. Ákimshilik quqyq buzýshylyq týraly kodekstiń 481-baby boıynsha hattama toltyrylyp, is Aqtóbe qalasynyń mamandandyrylǵan ákimshilik sotyna joldandy», - deıdi №70 mekemesiniń bastyǵy Aman Qulmuhambetov.

Onyń aıtýynsha, tyıym salynǵan zattardy Qylmystyq kodekstiń «Bopsalaý» baby boıynsha kúdikke ilikken dosyna jetkizbek bolǵan. Sóıtip, azyq-túlik ákelgen kezde, ebin taýyp jasyrady.

Aqtóbe oblysy boıynsha QAJD baspasóz hatshysy Gúlfaırýz Tóremuratovanyń aıtýynsha, tergeý ızolıatory rejım jáne kúzet bóliminiń qyzmetkerleri mekemege kelgen sálemdemelerdi tekserý barysynda bıyl 19 telefon tárkilengen bolsa, ótken 2022 jyly 21 telefon alynǵan.