Donald Trampqa Illınoıs shtatyndaǵy praımerızge qatysýǵa tyıym salyndy

<p>ASTANA. KAZINFORM &ndash; Sársenbide Illınoıs shtatynyń sýdıasy AQSh-tyń Kapıtolııin basyp alý oqıǵasyn alǵa tartyp, respýblıkalyq partııanyń bastapqy saılaýynda burynǵy prezıdent Donald Trampty shtattyń negizgi saılaý bıýlleteninen alyp tastaý kerek dep sheshti.</p>

Sheshimdi Kýk okrýginiń aımaqtyq soty shyǵardy. Illınoıstaǵy praımerız 19 naýryzǵa josparlanǵan.

Sýdıa Treısı Porterdiń qaýlysynda jazylǵandaı, 2021 jylǵy 6 qańtardaǵy kóteriliske qatysýyna baılanysty onyń esimi daýys berý bıýlleteninen alynyp tastalýy kerek.

Tramptyń saılaýaldy shtaby bul sheshimdi synǵa aldy, ony «konstıtýtsııaǵa qaıshy» dep sanaıdy jáne oǵan shaǵymdanýǵa nıetti. Sýdıa Porter sondaı-aq Demokratııalyq partııanyń múshesi bolǵandyqtan sheshimin birjaqty shyǵardy dep aıyptaldy.

Illınoıs - Donald Tramptyń bastapqy saılaýǵa qatysýyna tyıym salǵan úshinshi shtat. Buǵan deıin osyndaı qaýlylar Kolorado men Men shtattarynda shyǵarylǵan.

Árbir jaǵdaıda Konstıtýtsııanyń 14-shi tarmaǵyna silteme jasaldy, oǵan sáıkes Konstıtýtsııaǵa ant bergen jáne «búlikpen aınalysqan» adam memlekettik qyzmet atqara almaıdy. Onda bul erejeniń prezıdentterge qatysy bar-joǵy kórsetilmegen.

Kýk okrýgine Chıkago qalasy kiredi, ol – Illınoıs shtatyndaǵy halyq eń kóp qonystanǵan aımaq.

AQSh-taǵy saılaý 2024 jyldyń 5 qarashasyna belgilengen. Donald Tramp Nevada, Aıova, Nıý-Gempshır jáne Vırgın araldarynda ótken ishki partııalyq saılaýda senimdi túrde jeńiske jetti. Keshe AQSh prezıdenti Djo Baıden men Tramptyń Mıchıgandaǵy praımerızde jeńiske jetkeni belgili boldy.