Donald Týsk: Qazaqstan - Eýropalyq odaqtyń mańyzdy áriptesi

NUR-SULTAN. QazAqparat - Qasym-Jomart Toqaevtyń atyna Qazaqstan Respýblıkasynyń Prezıdenti laýazymyna saılanýyna oraı quttyqtaý jedelhattary kelip jatyr, dep habarlaıdy Aqorda.

Eýropalyq keńes tóraǵasy Donald Týsk óziniń quttyqtaý hatynda Eýropalyq odaqtyń Qazaqstanmen qarym-qatynasyna beıildi ekenin taǵy bir naqtylaǵan.

«Qazaqstan - Eýropalyq odaqtyń mańyzdy áriptesi. Qazaqstan men Eýropalyq odaq arasyndaǵy áriptestik pen yntymaqtastyq jónindegi kelisim, bolashaqtaǵy tereńdetýge umtylǵan bizdiń mazmundy is-qımylymyzdyń negizi bolyp tabylady», - delingen jedelhatta.

Donald Týsk beıbitshilik, turaqtylyq jáne gúldený bolyp tabylatyn Qazaqstannyń aımaqtyq yntymaqtastyq pen dıalogtardy júrgizýdegi rólin quptady.

Chehııa Respýblıkasynyń Prezıdenti Mılosh Zeman da Qasym-Jomart Toqaevty Qazaqstan Respýblıkasynyń Prezıdenti laýazymyna saılanýymen quttyqtady.

«Men Sizdiń Qazaqstan Respýblıkasynyń Prezıdenti laýazymyna saılanǵanyńyz týraly habardy úlken qýanyshpen qabyldadym. Sizdiń basshylyǵyńyzben eki eldiń dostyq qarym-qatynasy budan ári qaraı da gúldenip, yntymaqtastyǵymyz halyqtarymyzdyń ıgiligi úshin damı beretinine naq senimdimin», - delingen jedelhatta.

TMD Atqarýshy komıtetiniń tóraǵasy - Atqarýshy hatshysy Sergeı Lebedev óziniń quttyqtaý jedelhatynda, TMD elderiniń atynan baıqaýshylar mıssııasynyń jetekshisi retinde Qasym-Jomart Toqaevtyń Qazaqstan halqynyń aldynda úlken senimge ıe ekenine shynaıy kóz jetkizgenin atap ótken.

«Sizdiń Memleket basshysy laýazymyndaǵy qyzmetińiz budan ári qaraı da Qazaqstan Respýblıkasynyń qaryshtap damýyna, halyqaralyq deńgeıde óz ustanymyn nyǵaıtýǵa, sondaı-aq, Táýelsiz memleketter dostastyǵy keńistigindegi ıntegratsııalyq úderisterdiń tereńdeı túsýine zor yqpal eterine senimdimin», - delingen jedelhatta.

Tatarstan Prezıdenti Rýstam Mınnıhanov halyqtyń qoldaýy asa jaýapty laýazymda jemisti qyzmet etý úshin berik ári qýatty qural dep atap ótken.

«Bizdiń baýyrlas Tatarstan men Qazaqstan halyqtarynyń arasyndaǵy konstrýktıvti jáne tilektes yntymaqtastyq dástúrimizdi, Reseı-Qazaqstan kópqyrly strategııalyq qarym-qatynasynyń bir bóligi retinde qarastyryp, ózara mazmundy is-qımyldy arttyratynymyzǵa senimdimin», - delingen jedelhatta.