Donald Tramptyń soty qashan bastalatyny belgili boldy

ASTANA. QazAqparat - Memlekettik mańyzy bar qupııa qujattardy zańsyz saqtady dep aıyptalyp otyrǵan AQSh-tyń eks-prezıdenti Donald Tramp isine qatysty alǵashqy sot otyrysy ótetin kún belgili boldy, dep habarlaıdy QazAqparat Euronews-ke silteme jasap.

Federaldy sot Eılın Kennon AQSh-tyń eks-prezıdenti Donald Tramptyń qupııa qujattardy saqtaǵanyna qatysty sot isi 2024 jyldyń 20 mamyrynda ótedi dep belgiledi.

Tyńdalym onyń qazirgi prezıdent Djo Baıdenge qarsy saılaýaldy naýqany qyzyp turǵan shaqta bastalady.

Prokýror sot isin 2023 jyldyń jeltoqsanynda bastaýdy usyndy, al Tramp advokaty ony 2024 jyldyń qarashasynda ótetin prezıdent saılaýy aıaqtalǵansha shegere turýdy surady.

Aq úıdiń burynǵy basshysyna jalpy 38 bólik boıynsha aıyp taǵyldy, onyń ishinde eresekterge arnalǵan fılmderdiń aktrısasy Stormı Denıelske eshteńe aıtpaýy úshin aqsha tólegeni, sonymen qatar nesıe alý úshin jekemenshik baǵasyn kóterip kórsetkenine qatysty alaıaqtyq isi bar.

Buǵan deıingi prezıdent saılaýynyń nátıjesin joıýǵa tyrysý isi boıynsha tergeý jalǵasyp jatyr.