Donald Tramptyń Facebook pen Instagram paraqshalary qalpyna keltiriledi

ASTANA. QazAqparat – Meta-nyń jahan máseleleri boıynsha prezıdenti Nık Klegg arnaıy málimdemesinde Donald Tramptyń paraqshalary aldaǵy aptalarda qalpyna keltiriletinin jáne qoǵamnyń «saıasatkerlerdiń ne aıtyp jatqanyn estıtin múmkindigi bolýy kerek» dep esepteıtinin aıtty, dep habarlaıdy QazAqparat BBC-ge silteme jasap.

2021 jyldyń 6 qańtarynda Kapıtolııde bolǵan tártipsizdikterden keıin sol kezde qyzmetin bosatyp jatqan prezıdent Donald Tramptyń Facebook pen Instagram jelilerindegi paraqshasy belgisiz merzimge buǵattalǵan bolatyn.

Klegtiń aıtýynsha, Facebook osylaısha Tramptyń AQSh parlamentinde tártipsizdikke jol bergen jaqtastaryn qoldaýyna jaýap berdi.

«Akkaýnttardy ýaqytsha jabý tótenshe jaǵdaılar kezinde jedel qabyldanǵan sheshim bolatyn», - dedi Klegg.

Onyń sózinshe, kompanııa qazirgi ýaqytta Tramptyń paraqshalary qoǵam úshin qaýip tóndirmeıdi dep sheshken. Degenmen osy áleýmettik jelilerdiń erejesi qaıtadan buzylsa, Trampty odan da qatań jaza kútip tur.

Tramp Facebook-qa orala ma – belgisiz. 2021 jyly ol Truth Social dep atalatyn jeke áleýmettik jelisin ashty. Ony resmı qoldanatyndar sany bar bolǵany bes mıllıon adam bolsa, Facebook paıdalanatyndar sany – úsh mıllıard.

Foto:© AP Photo / Evan Vucci