Donald Tramp pen onyń áıeli koronavırýs juqtyrdy

VAShINGTON. QazAqparat – AQSh prezıdenti Donald Tramp pen onyń zaıyby Melanııa koronavırýs juqtyrdy, dep habarlaıdy QazAqparat.

Prezıdent Tramp óziniń jáne zaıybynyń COVID-19 juqtyrǵany týraly jańalyqty Twitter-degi resmı paraqshasynda juma kúni rastady.

«Búgin keshke AQSh-tyń birinshi hanymy jáne men koronavırýsqa test tapsyrdyq. Ol oń nátıje kórsetti. Biz dereý karantınge shyǵyp, em qabyldaýdy bastap kettik. Biz buny birge eńseremiz!» - dep jazdy prezıdent Twitter -de.

CNN -niń habarlaýynsha, buǵan deıin AQSh prezıdenti áleýmettik jelide óziniń keńesshisi Hoýp Hıksten koronavırýs anyqtalǵannan keıin zaıyby ekeýiniń karantınge ketetinin jazǵan bolatyn.

«Úzilissiz kóp jumys istegen Hoýp Hıkstiń koronavırýsqa tapsyrǵan testi oń nátıje berdi. Endi tapsyrǵan testiń nátıjesin kútemiz. Osy ýaqyt aralyǵynda biz karantın talaptaryn saqtaıtyn bolamyz», - dedi Tramp.

Hoýp Hıks Donald Tramppen birge kóptegen saparda, sonyń ishinde seısenbi kúni Klıvlendke prezıdenttik pikirsaıysqa qatysý úshin barǵan saparynda birge júrdi. CNN sol kúni AQSh prezıdentiniń tikushaǵyna otyrǵyzý kezinde Hıkste de, Aq úı basshysynyń ózge de keńesshilerinde maska bolmaǵanyn habarlaǵan bolatyn.

Hıkstiń koronavırýsqa tapsyrǵan testi oń nátıje kórsetkeni týraly aqparatty birinshi bolyp Bloomberg jańalyqtar agenttigi habarlady.