Donald Tramp Qazaqstannyń BUU Qaýipsizdik Keńesine tóraǵalyǵyn joǵary baǵalady - AQSh Elshisi

ASTANA. QazAqparat - AQSh Prezıdenti Donald Tramp BUU Qaýipsizdik keńesine qazaqstandyq tóraǵalyq óte tıimdi ári jan-jaqty boldy dep sanaıdy. Bul týraly búgin Elbasy Nursultan Nazarbaevtyń Vashıngtonǵa resmı saparynyń qorytyndysyna oraı BAQ ókilderiniń saýalyna jaýap bergen AQSh-tyń Qazaqstandaǵy Tótenshe jáne Ókiletti Elshisi Djordj Krol aıtty, dep habarlaıdy QazAqparat.

«AQSh Qazaqstannyń BUU Qaýipsizdik Keńesine tóraǵalyǵy kezindegi jumystarynyń nátıjesin óte joǵary baǵalaıdy. Donald Tramp muny Nursultan Nazarbaevqa da aıtqan edi. Tramp Qazaqstannyń uıymǵa tóraǵalyǵy óte tıimdi ári jan-jaqty boldy dep sanaıdy. Qazaqstan Qaýipsizdik keńesine tóraǵalyǵy kezinde ózin kásibı ustaı bildi. Biz Qazaqstan dıplomatııasy men tóraǵalyq qyzmetiniń deńgeıin joǵary baǵalaımyz», - dedi Djordj Krol.

Osy rette Elshi BUU janyndaǵy Qazaqstannyń turaqty ókili Qaırat Omarovtyń tarıhta alǵash ret BUU Qaýipsizdik keńesiniń barlyq turaqty ókilderiniń Aýǵanstanǵa saparyn uıymdastyrǵanyn eske salyp ótti.

«Amerıkalyq ókil, Elshi Nıkkı Heılı atalǵan saparǵa qatysty jáne ol da Qazaqstannyń BUU Qaýipsizik keńesine tóraǵalyǵynyń tıimdi bolǵanyn aıtty. Óte kúrdeli máseleler men qararlar kóterildi. Biraq, Qazaqstan QK-niń barlyq músheleri arasynda ózin jan-jaqtylyǵyn, istiń retin taba alatyndyǵyn kórsetti. Shyndyǵynda óte kúrdeli jumys bolǵanymen, óte tıimdi nátıje  boldy. Biz solaı dep sanaımyz», - dedi ol.
 

Esterińizge sala ketsek, 2018 jyldyń 1-31 qańtary aralyǵynda Qazaqstan BUU Qaýipsizdik keńesine tóraǵalyq etti. 19 qańtarda Qazaqstan Prezıdenti Nursultan Nazarbaevtyń tóraǵalyǵymen BUU Qaýipsizdik keńesiniń «Jappaı qyryp-joıý qarýyn taratpaý: sharalar men senim» taqyrybyndaǵy otyrysy ótti.