Donald Tramp: AQSh tarıhyndaǵy eń kinásiz adam bolarmyn

ASTANA. QazAqparat – AQSh-tyń burynǵy prezıdenti Donald Tramp ózine taǵylyp otyrǵan aıyptaýlardyń negizsiz ekenin málimdedi, dep habarlaıdy QazAqparat Euronews-ke silteme jasap.

Tehasta ótken mıtıngide sóılegen sózinde Donald Tramp óziniń «el tarıhyndaǵy eń kinásiz adam bolýy múmkin» ekenin aıtty. Ol mıllıondaǵan qujattar tekserilip, qorytyndysynda ózine taǵylǵan zań buzýshylyqtarǵa dálel tabylmaǵanyn alǵa tartty.

«Sizder aqtalasyzdar jáne bastaryńyzdy maqtanyshpen joǵary ustaısyzdar, al bizdiń ádildik júıemizdi búldirip jatqan baskeserler men qylmyskerler jeńiledi, bedelden jurdaı bolyp, tolyqtaı áshkerelenedi», - dedi ol.

Aıta ketsek, Donald Tramp «pornoaktrısa Stormı Denıelske tólengen qarajat týraly aqparatty jasyrý úshin saılaý naýqany qarsańynda qarjylyq qujattardy qoldan jasady» dep aıyptalady.

Buǵan deıin AQSh-tyń eks-prezıdenti Donald Tramp 2024 jyly ótetin saılaýǵa qatysatynyn málimdedi. Ol prezıdent saılaýyna túsýge resmı ótinishin 2022 jylǵy qarashada bergen bolatyn.

Eske salsaq, 2020 jylǵy saılaýda Tramp qazir prezıdent Djo Baıdennen jeńilip qalǵan edi.

Tramptyń aldaǵy saılaýdaǵy alǵashqy básekelesi de belgili. Ońtústik Karolına shtatynyń burynǵy respýblıkashyl gýbernatory jáne AQSh-tyń BUU janyndaǵy turaqty ókili bolǵan Nıkkı Heılı 2024 jylǵy prezıdenttik saılaýǵa túsýge daıyn ekenin málimdegen bolatyn.