Donald Tramp 4 sáýirde sotta bolýy kerek
Manhetten Úlken qazylar alqasynyń músheleri beısenbi kúni AQSh-tyń eks-prezıdentine qylmystyq is boıynsha resmı túrde aıyp taǵylýyn daýysqa salǵan.
Donald Tramp bul jaǵdaıdy «saıası qýdalaý jáne tarıhtaǵy saılaýǵa aralasýdyń eń joǵarǵy deńgeıi» dep ataǵan. Ol osyǵan deıin de ózine taǵylyp otyrǵan aıyptaýlardyń negizsiz ekenin málimdegen-di.
Burynǵy vıtse-prezıdent Maık Penstiń de pikiri osyǵan saıady.
«Amerıkalyqtardyń basym kópshiligine bul Manhettenniń okrýgtik prokýrory júrgizip otyrǵan saıası qýdalaý ekeni túsinikti dep oılaımyn. Ol naqty bir amerıkalyqqa aıyp taǵylýyn kádimgideı nasıhattady», - deıdi ol.
Al, AQSh Prezıdenti Djo Baıden ázirge bul jaıtqa qatysty eshqandaı pikir bildirmedi.
Tramp el tarıhynda qylmystyq is boıynsha aıyp taǵylǵan alǵashqy eks-prezıdent bolyp otyr. Buǵan deıin habarlanǵanyndaı, sebep – 2016 jylǵy saılaý naýqanynda pornoaktrısaǵa «aýyzbastyryq» berilýi.
Aıta ketsek, AQSh-tyń eks-prezıdenti Donald Tramp 2024 jyly ótetin saılaýǵa qatysatynyn málimdedi. Ol prezıdent saılaýyna túsýge resmı ótinishin 2022 jylǵy qarashada bergen bolatyn.
Tramptyń aldaǵy saılaýdaǵy alǵashqy básekelesi de belgili. Ońtústik Karolına shtatynyń burynǵy respýblıkashyl gýbernatory jáne AQSh-tyń BUU janyndaǵy turaqty ókili bolǵan Nıkkı Heılı 2024 jylǵy prezıdenttik saılaýǵa túsýge daıyn ekenin málimdegen edi.
Eske salsaq, 2020 jylǵy saılaýda Tramp qazir prezıdent Djo Baıdennen jeńilip qaldy.