Donald Tramp 200 myń dollar kepilmen bosatyldy

ASTANA. QazAqparat – Donald Tramptyń saılaý nátıjesine aralasýǵa oqtalý isin júrgizip jatqan Amerıkanyń Djordjııa shtatynyń sýdıasy eks-prezıdentti 200 myń dollarǵa kepilmen bosatý jóninde sheshim qabyldady, dep habarlaıdy QazAqparat BBC-ge silteme jasap.

Tramp pen taǵy 18 aıyptalýshy juma kúni túske deıin Atlanta shtatynyń astanasyna Fýlton okrýginiń sotyna kelýi tıis.

Tramp osy is boıynsha ózine taǵylǵan aıypty joqqa shyǵaryp otyr.

Kepil týraly sheshimde Donald Tramptyń kýágerlerge ses kórsetpeı, sotqa deıin bostandyqta qalýyna ruqsat etilgen.

«Aıyptalýshy ózine belgili jáne osy is boıynsha jaýapkerler nemese kýágerler sanalatyn adamdarǵa qatysty qorqytpaýǵa nemese sot tóreligin iske asyrýǵa ózge de tásilmen kedergi keltirmeýge tıis. Joǵaryda atalǵandarǵa áleýmettik jelilerdegi jazbalar nemese basqa adamdardyń áleýmettik jelilerdegi jazbalaryn repost jasaý da kiredi», - delingen dúısenbi jarııalanǵan sheshimde.

Donald Tramp dúısenbide óziniń Truth áleýmettik jelisinde respýblıkashyl Braıan Kempti qoldaǵan Djordjııa gýbernatoryna qatysty replıka jibergen.

Іs materıaldaryna sáıkes, 2020 jyldyń jeltoqsanynda, saılaýdan keıin Tramp Kempke (jáne shtattyń basqa joǵary sheneýnikterine) qońyraý shalyp, saılaý nátıjesin óz paıdasyna qaıta qaraýdy talap etken, biraq olar bas tartqan.

Sottyń kepil týraly sheshimine sáıkes, Tramp osy is boıynsha basqa aıyptalýshylarmen tek advokattyń qatysýymen baılanysa alady.

«Oılap kórińizshi! Beısenbide men solshyl radıkal okrýg prokýrory Fanı Ýıllıs meni qamaýǵa alýy úshin Djordjııa shtatynyń Atlanta qalasyna baramyn», - dep jazdy Tramp áleýmettik jelisinde.

Djordjııadaǵy isten bólek, Donald Trampqa qarsy taǵy úsh is qozǵaldy.

Ol AQSh qazirgi jáne burynǵy prezıdentteri arasynda qylmystyq is boıynsha aıyptalǵan tuńǵysh adam.

77 jastaǵy Tramp kelesi jyly ótetin prezıdent saılaýyna qatyspaqshy jáne Respýblıkalyq partııadan úmitkerler arasynda kósh bastap keledi.

Prezıdenttikke kandıdattyń partııaishilik saılaýy, praımerız qańtarda bastalady.

Eske salaıyq, Aq úıdiń burynǵy basshysy Donald Trampqa jalpy 38 bólik boıynsha aıyp taǵyldy, onyń ishinde memlekettik mańyzy bar qupııa qujattardy zańsyz saqtaǵany, eresekterge arnalǵan fılmder aktrısasy Stormı Denıelske eshkimge eshteńe aıtpaýy úshin aqsha tólegeni, sonymen qatar nesıe alý úshin jekemenshik baǵasyn kóterip kórsetkenine qatysty alaıaqtyq isi bar.

Prezıdent saılaýynyń nátıjesin joıýǵa tyrysý isi boıynsha tergeý jalǵasyp jatyr.