Dombyra jasaý ekiniń biriniń qolynan kele bermeıdi - sheber

KÓKShETAÝ. QazAqparat - Dombyra jasaý ekiniń biriniń qolynan kele bermeıdi. Bul týraly QazAqparat tilshisine kókshetaýlyq bes saýsaǵynan óner tamǵan usta, aǵashtan ulttyq buıymdardy jasaýmen aınalysatyn sheber Shoqan Elamanov aıtty.

Onyń aıtýynsha, dombyra jasaý - urpaqtan urpaqqa jalǵasyp kele jatqan atakásip. Eskiden kele jatqan dástúrge adaldyǵyn saqtaǵan adamdar ǵana aınalysa alady.

«Dombyra jasaý ekiniń biriniń qolynan kele bermeıdi. Onyń ózindik qupııasy bar. Ár sheber óz qupııasyn kez kelgen adamǵa jaıyp salmaıdy. Alaıda, eń basy qupııasy - ol árıne, dombyranyń aǵashyna baılanysty. Aǵashy qandaı bolsa, úni de sondaı áýezdi bolyp keledi», - deıdi Shoqan Elamanov.

Sonymen qatar, sheber dombyranyń aǵashynan bólek, ony jasaǵan adamnyń qolyna da baılanysty ekenin aıtty. Ár usta dombyrany jasaý tehnologııasyn bilýi tıis.

«Aldymen, aspapqa laıyqty aǵash tańdalady. Ol ábden keptiriledi. Sodan soń dombyranyń shanaǵyn belgili bir zańdylyqtarǵa sáıkes ortalastyrý qajet. Bet taqtaıynyń qattylyǵy, qalyńdyǵy - bári esepteledi. Sál qıys ketse, dybys durys shyqpaýy múmkin», - deıdi Sh. Elamanov.

Kez kelgen aǵashtan shaýyp, dombyra isteýge bolady. Biraq, onyń barlyǵy dombyrashylardyń kóńilinen shyǵa bermeıdi. Sondyqtan, Shoqan ár jasaǵan dombyrasyn kásibı dombyrashylarǵa kórsetip, aqyl-keńesin alyp otyrady.

«Meniń basty aqylshym, dombyramnyń synshysy - dáýlesker dombyrashy Sáken Birjanov. Ár jasaǵan dombyramdy Sákeńe kórsetip otyramyn. Ol kem-ketigi men jaqsy tusyn aıtyp otyrady. Kelesi joly dombyra jasaǵanda onyń eskertýlerin eskerýge barynsha tyrysamyn», - deıdi sheber.

Aǵashtan túıin túıip, jansyzǵa jan bitirgen Shoqan sheberdiń shapqan dombyralaryn osy kúni elge tanymal, aıtýly aqyndar ustap, óner kórsetip júr. Aptasyna bir dombyra jasaıtyn sheberdiń sózinshe, sońǵy jyldary ulttyq aspapqa degen suranystyń artqany baıqalady.