Dombyra ulttyq brendimiz ǵana emes, ulttyq bolmysymyz – Máýlen Áshimbaev
«Barshańyzdy Ulttyq dombyra kúnimen quttyqtaımyn! Dombyra – ultymyzdyń úni, kúmbirine halqymyzdyń tarıh dastanyn, qýanyshy men muńyn, erligi men erkindigin túgel syıdyryp turǵan qasıetti aspap. Sol sebepti dombyra ulttyq brendimiz ǵana emes, ulttyq bolmysymyz dep senimdi túrde aıta alamyz. Tól mýzykamyzdyń jahandyq bıikke kóterilýinde de dombyranyń orny erekshe. Oǵan Qurmanǵazy men Táttimbetten, Súgir men Dınadan qalǵan kúıler dálel. Jyraýlardyń jyr-termeleri men sal-serilerdiń áýezdi ánderi de dombyra arqyly túrlene tústi», - dep jazdy Senat spıkeri Facebook paraqshasynda.
Sonymen qatar Senat Tóraǵasy qazirgi tańda qasıetti aspaptyń qadirin arttyrý arqyly ulttyq kodymyzdy jańǵyrtý – bárimizdiń abyroıly mindetimiz ekendigine basa nazar aýdartady.
«Elbasymyzdyń Ulttyq dombyra kúnin belgileýdegi basty maqsaty da osy ekeni anyq. Sonyń aıasynda sońǵy kezderi dombyraǵa, jalpy ulttyq ónerge degen qyzyǵýshylyq erekshe sıpatqa ıe bolǵany anyq baıqalady. Sondyqtan aldaǵy ýaqytta dombyranyń qadir-qasıeti burynǵydan da arta túsetinine eshqandaı kúmán joq. Endeshe tól qundylyǵymyzdy tórge ozdyratyn mereke qutty bolsyn! Qasterli dombyramyzdyń úni aspandaı bersin!», - dedi Máýlen Áshimbaev.