Dombyra meniń serigime aınaldy – Denıs ıAkovlev
Qostanaı oblysy Amanqaraǵaı aýylynda kindik qany tamǵan Denıs ıAkovlev mektep qabyrǵasynda-aq án salyp júretin.
«Otan Ana» onyń súıikti áni-tin. Oqýshy kezinde tipti aımaqtyq baıqaýlarǵa qatysty. Degenmen mektep bitirgennen keıin temirjolshy mamandyǵyna oqýǵa tústi, qosymsha oıyn avtomattary zalynda kúzetshi boldy.
Sosyn áskerı qyzmette boldy. Onda da án salýyn qoıǵan joq. Ásirese, qazaq tilinde.
-Men azamattyq boryshymdy óteýmen birge mýzykaǵa bet burdym. Ulttyq ulannyń án-bı ansamblimen birge sahnaǵa shyǵýdy armandadym. Olarmen amandasýdyń ózi maǵat baqyt edi, - dep eske alady Denıs.
Degenmen ansambl qataryna iligý ońaı bolǵan joq. Oǵan rotada qyzmet etý kerek edi. Denısti bul baǵytynan qaıtarýǵa tyrysty, biraq ol óz tańdaýyn jasap, talpyna berdi. Aqyry ansambldegiler muny baıqap, ózderine shaqyrdy. Ol kezde ansambl bastyǵy polkovnık Rahmetjan Shamuratov edi. Ol jas jigittiń múmkindigin baǵalaı bildi. Merzimdi áskerı boryshyn ótegennen keıin Denıs kelisimshartpen ansamblde qaldy, sodan beri odan ajyraǵan emes.
Birde ansambl «Topjarǵan» televızııalyq mýzyka jobasyna daıyndaldy. Uıymdastyrýshylar «Denıs dombyra tarta bile me?» dep surady. Oǵan deıin Denıs bul aspapta oınap kórgen emes. Dostary «Eki jıren» ániniń sazyn kórsetti. Ol sabaqty beınetaspaǵa jazyp alyp, qaıtalap úırendi. Sóıtip ol atalmysh jobanyń fınalyna shyqty, bul sarbazdy qanattandyra tústi.
-Meniń ansambldegi dosym Ashat Taýshev bárine úıretti. Ala tańnan túnge deıin mýzykamen aınalysatynbyz. Tipti qysta avtobýs kútip tursaq ta, ol opera óneri jóninde áńgimeleıtin. Túrli taspany kórsetetin. Oǵan deıin operany tyńdap, túsinip kórgen emes edim, - deıdi óz áńgimesinde D.ıAkovlev.
Ashat Taýshev shynynda da tamasha tálimger edi. Ol qandaı ma bolsyn jaǵdaıǵa qaramastan, kún saıyn mýzykamen aınalysýdy Denıstiń daǵdysyna aınaldyrdy. Denıstiń tipti kúndelikti tártibi de ózgerdi.
-Men óte tártipti bolamyn dep sheshtim. Tańmen saǵat 05.30-da turyp, ózen jaǵalaýymen júgire bastadym, - deıdi ol.
Denıstiń bul ádeti beıtanys adamnyń ómirin saqtap qalýǵa járdemdesti. Tańmen osyndaı jattyǵý kezinde Denıske er adam júgirip kelip, ózende bireýdiń qalqyp júrgenin aıtty.
-Biz júgirip kelsek, ózen ortasynda bireýdiń basy kórinedi. Tiri eken, shyq dep aıqaılasaq, úndemeıdi, - dep eske alady mýzykant.
Bul 2018 jyl edi. S.Seıfýllın kóshesi basynda meshit qasynda ózennen ótetin jalpaq temir turba jatatyn. Adamdar jol qysqartyp, keıde sonyń ústimen ótetin. Er adam da sonymen ótem dep, aıaǵy taıyp ketken bolýy kerek.
-Bir ájeı taıaǵyn berdi. Taıaqty er adamǵa usynyp edim. Aıaq-qoly qurysyp qalǵan eken. Jedel járdem shaqyrýǵa ýaqyt joq. Sosyn qaltamda uıaly telefonym bolsa da, sýǵa súńgip ketip, er adamdy alyp shyqtym. Ol ózine kelgennen keıin temeki surady. Men tartpaıtynymdy aıttym. Sosyn ony jedel járdem kóligi alyp ketti de, sodan ony kórgen joqpyn, - deıdi Denıs.
Bul oqıǵa Ulttyq ulanǵa belgili boldy. Osy áreketi úshin D.ıAkovlev «Jaýyngerlik erligi úshin» medalimen marapattaldy.
Qazirgi kezde D.ıAkovlev ansambldegi qyzmetin jalǵastyrýda.
Eske sala keteıik, budan buryn aǵaıyndy egizderdiń Ulttyq ulanda áskerı boryshyn ótep júrgenin jazǵan bolatynbyz.