Dombyra kúni 1 myń aqtóbelik kúı tartty

AQTÓBE. QazAqparat - Aqtóbeniń Qazaq halqyna myń alǵys stellasy alańynda Ulttyq dombyra kúni 1 myń dombyrashy bir mezette birneshe kúı oryndady, dep habarlaıdy QazAqparat tilshisi.

Ulttyq dombyra kúni oblysqa tanymal ataqty kúıshiler bastaǵan 1 myń dombyrashy bir mezette birneshe kúı tartty. Qolyna ulttyq aspapty ustaǵan aqtóbelikterge Qazaqstannyń eńbek sińirgen mádenıet qaıratkeri, kompozıtor, dırıjer Qaıyrǵalı Qojanbaev alǵys aıtty.

«Dombyra qazaqtyń jan joldasy, rýhanı jan azyǵy bolyp kele jatyr. Dombyra týraly án de bar. Bálenbaı myń kúı bar. Ánshilerdiń, kúıshilerdiń, orkestrdiń qolynda, bir sózben aıtqanda báriniń qolynda – dombyra. Dombyra týraly «9 perne taǵylǵan, jeldeı esip, sýdaı tasyp aǵylǵan» degen án sózderi bar. «Naǵyz qazaq qazaq emes, naǵyz qazaq – dombyra» dep te aıtamyz. Dombyrany joǵary sanap, áspettep, oǵan ózderiniń rýhanı sózderin, kóńildegi, júregindegi oılaryn aıtqan lebiz de az emes. Úkimetimiz osynyń bárin eskere kelip, dombyraǵa osyndaı kún bólgen. Oǵan halyq rıza. Qazaq halqy, árbir qazaq tiri turǵanda dombyra ólmeıdi, dombyra saıraıdy, dombyra kúı tartady, óziniń adamǵa degen, halyqqa degen qyzmetin atqara beredi», - dedi Qaıyrǵalı Qojanbaev.

Sharada Qurmanǵazy Saǵyrbaıulynyń «Adaı», «Saryarqa», «Balbyraýyn», Ábdimomyn Jeldibaevtyń «Erke sylqym», Ahmet Jubanovtyń «Bı kúıi» kúılerin oryndady. Sharaǵa qala turǵyndarymen qatar mektep oqýshylar, stýdentter, mýzyka mektebiniń tárbıelenýshileri qatysty.

«Men anama, ájeme dombyra úıirmesine qatysqym keletinin aıttym. Úıirmeniń keıbiri alys boldy. Biraq keıin mektepte ashyldy. Qazir kúı úırenip júrmin. Ájem de úıretedi. Ózim 10 jastamyn. Dombyra shertip, án de aıtqym keledi»,- dedi mektep oqýshysy Nuraıym Sákenova.
Bul kúni oqýshylar ǵana emes, ustazdary da belsendi boldy.
«Dombyra kúnin durys belgiledi. Dombyra – qazaqtyń jany. Dombyramen muń-zaryn aıtyp, sherin tarqatady. Úıde eki dombyram bar. Nemerelerime de úıretemin. Yntasy jaqsy»,- dedi mádenıet úıiniń qyzmetkeri Ómirserik Tájiǵulov.

Shara kezinde qolóner sheberleriniń kórmesi ótti.